Strukturat paralele serbe kanë shpeshtuar kërkesat për realizimin e një autonomie të gjerë, që në mënyrë eufemistike fshihet pas ‘statusit special’. Kreu i paligjshëm i pjesës veriore të Mitrovicës, Kërstimir Pantiq ka thënë se mbështet një status të veçantë për veriun në kuadër të Republikës së Kosovës. “Meqë shpesh herë po përmendet statusi special dhe se ndarja e Kosovës është e pamundur, ne kemi ardhur në përfundim se një gjë e tillë mund të jetë e pranueshme në kuadër të Kosovës së pavarur”, ka thënë Pantiq, përcjellin mediet. Më tej, ai ka përgënjeshtruar spekulimet se serbët kanë hequr dorë nga mbajtja e referendumit.

Zëvendëskryeministri i Kosovës, Hajredin Kuçi e ka quajtur ilegal referendumin e paralajmëruar nga serbët e veriut. Ai u ka bërë thirrje institucioneve ndërkombëtare që të vendosin rendin dhe ligjin në këtë pjesë të Kosovës, për të shmangur ndasitë etnike. “Është referendum nëse tenton të quaj dikush te tillë, ilegal, pa fuqi juridike. Ky i ka dy qëllime, qëllimi i parë është që të krijohet legjitimitet disa forcave politike, po i quaj serbe atje, dhe e dyta të përdoret si mjet për zhvillimet e atjeshme politike”, ka thënë Kuçi. Sipas tij, ky referendum është më shumë për konsum të brendshëm politik midis serbëve të veriut, ndërsa ka përsëritur se veriu ka nevojë për rend dhe ligj, legjitimitet demokratik, zhvillim ekonomik dhe jo për ndonjë zgjidhje tjetër të veçantë.

NATO e ka bërë të qartë se nuk do të ketë zvogëlim të forcave të kësaj aleance në misionin e tyre në Kosovë. Sekretari i Përgjithshëm i NATO, Anders Fogh Rasumsenka thënë se çështja e veriut nuk mund të tejkalohet përmes mjeteve ushtarake. “Duhet një zgjidhje politike e cila duhet të negociohet për të siguruar një zgjidhje afatgjatë, nga e cila do të përfitonin të gjitha palët“, citohet të ketë thënë ai. Sipas të dhënave më të fundit të NATO-s, misioni i KFOR-it ka gjithsej 5.790 pjesëtarë, ndërkaq në mesin e tyre Shqipëria ka vetëm 4 ushtarë.

Ambasadori britanik në Beograd, Michael Davenport ka theksuar se ndarja e Kosovës nuk do  të ishte qasje konstruktive dhe madje do të mund të ishte shumë e rrezikshme. “Ndarja nuk është qasje e mirë, dhe në njëfarë mënyre madje është edhe e rrezikshme, sepse do të kishte pasoja të këqija edhe në shtetet tjera të rajonit”, ka thënë Davenport për B92, duke shtuar se edhe qëndrimi i Britanisë së Madhe është i tillë. Duke komentuar planin katër pikësh të Tadiqit, ai ka sqaruar se ato janë të instaluara brenda Pakos së Ahtisaarit. Sa i përket përfaqësimit të Kosovës, ambasadori britanik ka pohuar se duhet gjetur një zgjidhje që do t’i mundësonte Kosovës të luante rolin e saj të plotë në forumet rajonale.

Kryeministri i vendit, Hashim Thaçi ka shprehur edhe njëherë kundërshtimin e prerë ndaj mundësisë së heqjes së termit ‘Republikë’. Kryeministri ka thënë se edhe sikur krejt spektri politik të pranonte heqjen e Republikës, ai nuk do të pranonte një gjë të tillë. “E ardhmja edhe e veriut të Mitrovicës është e ardhmja identike me shtetin sovran të Kosovës. E ardhmja e veriut është e ardhmja e Kosovës, duke respektuar gjithmonë Kushtetutën dhe ligjet e Kosovës; duke respektuar dokumentin e presidentit Ahtisaari, prandaj në asnjë rrethanë nuk do të ketë as status special, as ndonjë propozim që lexohet në ndonjë medium, dhe një gjë e tillë asnjëherë nuk është shtruar së diskutuari, e lëre së propozuari nga ndokush. Pra, veriu i Mitrovicës është pjesë e Kosovës. Kosova do të funksionojë si një njësi shtetërore, me integritetin territorial të respektuar e garantuar e të njohur edhe ndërkombëtarisht”, ka thënë Thaçi në një intervistë për Radio ‘Evropa e Lirë’. Më tutje, ai ka theksuar se Qeveria dhe mekanizmat ndërkombëtarë do të vazhdojnë të punojnë që të jenë sa më afër qytetarëve në veri.

Burime të gazetës “Zëri’ kanë siguruar propozimin 4-pikësh të Tadiqit, i cili sugjeron krijimin e një lloj Republike serbe në veri të Kosovës. Dokumenti aq i përfolur në opinion, kërkon zgjidhje që u leverdisin vetëm serbëve, ndërsa nuk ofron asgjë për koncesionet, që sipas po këtij dokumenti, duhet t’i bëjnë shqiptarët. Tri nga katër pikat e propozuara nga Tadiq kanë ngjashmëri të mëdha me ato që ofrohen për serbët në Planin e Ahtisaarit. Pos të tjerash, në pikën e tretë ku flitet për veriun e Kosovës, kërkohet që të krijohen entitete të veçanta për komunat e veriut, të cilat së bashku do të quheshin edhe zyrtarisht si ‘North Kosovo’ ose ‘Veriu i Kosovës’.

Kryetari i Kuvendit të Kosovës, Jakup Krasniqi, në një emision debati në KTV është shprehur i prerë se duhet të kërkohet llogari ndaj delegacionit të Kosovës, nëse ndodh të hiqet fjala Republikë në përfaqësimin e Kosovës, në nismat rajonale, ashtu sikur po kërkon Bruksesli dhe në parim ka pranuar edhe  kryesuesja e delegacionit në bisedime me Serbisnë, Edita Tahiri. Po këtë qëndrim e ka shprehur edhe zëvendës-kryeministri, Hajredin Kuçi, i cili ka deklaruar se Kosova në arenën ndërkombëtare nuk do të përfaqësohet pa termin “Republikë”. Sa i përket fusnotës, Kuçi ka thënë se nëse do të ketë fusnotë për Kosovën, do të ketë edhe për Serbinë dhe se nuk do të pranohet asnjë fusnotë e cila do ta dëmtojë Republikën e Kosovës.