Zyrtarë të Agjencisë Kosovare të Privatizimit kanë mohuar të jetë arritur ndonjë marrëveshje për menaxhimin e Trepçës në veri të vendit. Drejtoresha e këtij institucioni, Mrika Tahiri ka thënë se nuk ka asnjë marrëveshje me ndonjë kompani të huaj a vendore në lidhje me menaxhimin e Trepçës. Sipas saj, çdo marrëveshje e arritur jashtë AKP-së dhe Qeverisë së Kosovës është e jashtëligjshme. “Nuk ka asnjë marrëveshje nga ana jonë për menaxhimin e Trepçës, dhe çdo marrëveshje tjetër jashtë institucioneve tona është jo e ligjshme dhe jo funksionale”, ka theksuar Mrika Tahiri.

Ministri i Tregtisë dhe Telekomunikacionit të Serbisë, Rasim Lajiq ka pohuar se gjatë takimit të fundit në kuadër të bisedimeve teknike, janë definuar disa nga çështjet kryesore kontestuese në fushën e telekomunikacionit. Duke vlerësuar rrjedhat e takimit të fundit, ai ka thënë se çështja më kontestuese mbetet kërkesa e Kosovës për fitimin e një numri të ri karakteristik telefonik. “Ka mbetur që të dy palët t’i definojnë kërkesat e tyre, ta paraqesin dokumentacionin dhe t’i propozojnë zgjidhjet për çështjet kontestuese”, ka thënë Lajiq për agjencinë Beta. Ai ka bërë të ditur se takimi i radhës do të mbahet pas 22 majit, vetëm pasi që të ketë përfunduar takimi i kryeministrave të Kosovës dhe Serbisë.

Policia e Kosovës ka nisur hetimet për fondin e 3 përqindëshit të Qeverisë në ekzil, që udhëhiqej asokohe nga Bujar Bukoshi. Mediet bëjnë të ditur se kanë filluar të hetohen të gjitha transaksionet e kryera nëpër banka të ndryshme ku ishin deponuar shuma të mëdha parash nga ky fond. Mësohet se kjo çështje është ngritur fillimisht nga të huajt, por tani lënda ka kaluar tek vendorët.  Gjatë këtij hetimi janë duke u intervistuar të gjithë njerëzit që kanë mbajtur poste të rëndësishme në Qeverinë në ekzil. I pyetur në lidhje rastin, Bujar Bukoshi ka thënë se “nuk ka asgjë të keqe nëse hetohet ky fond”. Ai ka thënë se është i gatshëm të bashkëpunojë me organet e drejtësisë nëse i kërkohet një gjë e tillë.

Zyrtari i lartë i Partisë Liberale në Gjermani, Rainer Shtajner ka thënë se Bundestagu gjerman nuk do të votojë që Beogradi të marrë datën për fillimin e bisedimeve për pranim në BE. Ai ka thënë për gazetën beogradase ‘Danas’ se dështimi i zbatimit të marrëveshjes së Brukselit do të thotë ngrirje e proceseve integruese të Serbisë. Sipas tij “nëse Serbia dakordohet me Kosovën, për zbatimin e Marrëveshjes, Bundestagu do të votojë për t''i dhënë asaj datën e fillimit të negociatave, në samitin e BE-së në qershor”.

Paralajmërimi për hapjen në qershor të këtij viti të hapësirës së sipërme ajrore të Kosovës nga NATO ka gjasë të shtyhet sërish. Zëdhënësja e NATO-s, Oana Lungescu citohet të ketë thënë se po punohet në drejtim të zgjidhjes së kësaj çështje edhe me Hungarinë, shteti anëtar i NATO-s i cili ka fituar të drejtën e menaxhimit të hapësirës së sipërme ajrore të Kosovës. Hapësira e sipërme ajrore e Kosovës është mbyllur qysh nga viti 1999 dhe nuk do të hapet as në qershor përkundër premtimeve të NATO-s dhe Qeverisë së Kosovës. Zëdhënësja e NATO-s nuk ka përjashtuar se do të ketë bisedime edhe me shtetet fqinje për këtë çështje. Siç dihet Serbia është duke kërkuar që të ketë negocime të mëtejshme për hapësirën ajrore të Kosovës.