Takimi ndërmjet kryeministrit  të Kosovës, Hashim Thaçi dhe atij serb Ivica Daçiq, në Bruksel, me ndërmjetësimin e komisares së BE-së Keterin Ashton ka përfunduar pa sukses, ndërkohë që palët pritet të vazhdojnë bisedimet edhe sot.  Takimi i thirrur nga zonja Ashton kishte për qëllim arritjen e një ujdie  për implementimin e marrëveshjes  së  19 prillit. Pavarësisht nga dështimi dhe shtyrja e takimit, kryeministri Thaçi është shprehur tejet optimist se bisedimet do të përfundojnë me pajtim  mes palëve. Besoj se nuk do të humbim kohë, meqë jemi të vendosur që të arrijmë marrëveshje dhe të fillojmë zbatimin në terren. Kjo marrëveshje do të shënojë një hap përpara për normalizimin e marrëdhënieve tona dhe perspektivën evropiane të vendeve dhe popujve tanë, ka thënë Thaçi, ndërkohë që Daçiq nuk ka dhënë ndonjë deklaratë për medie.

Duke komentuar pamundësinë e aktivizimit të formulës së reciprocitetit mes Veriut dhe Kosovës Lindore, deputeti i PDK-së, Arsim Bajrami ka deklaruar se autoritetet e Kosovës nuk kanë mundur që ta shtrojnë formulën e tillë për shkak se Kosova nuk kishte sovranitet në pjesën veriore, ndërsa Serbia e kishte krejt aparatin e vet represiv në Luginën e Preshevës.  Aktualisht  nuk kemi pasur mbështetjen e autoriteteve ndërkombëtare për të kushtëzuar problemin e shqiptarëve në tri komunat e Lindjes  me çështjen e serbëve në pjesën veriore të Kosovës. Prandaj, nuk kemi dashur që të rrezikojmë në këtë fazë të bisedimeve. Megjithatë, në momentin kur Kosova do ta shtrijë autoritetin e vet në veri të Kosovës, atëherë sigurisht se do të ketë mundësi që të shtrohet parimi i reciprocitetit. Ndërkohë, liderët e shqiptarëve të tri komunave  tashmë duket se janë të vendosur që të shuajnë divergjencat ndërmjet tyre dhe të çojnë zërin e bashkuar për të drejtat e shqiptarëve.

Në një deklaratë për media nga Lëvizja Vetëvendosje, thuhet se në procesin e rrejshëm të përfundimit të mbikëqyrjes ndërkombëtare të Pavarësisë, Vetëvendosja e vetme pati kundërshtuar këtë proces, i cili në vend se ta hiqte mbikëqyrjen përmbi pavarësinë e Kosovës, vetëm sa e riformatizonte atë duke ia zgjeruar veprimin përmes formalizimit të kategorisë së përfaqësuesit ndërkombëtar. E jashtmja përbrendësohej, duke i dhënë karakter të përhershëm asaj që ishte menduar të jetë e përkohshme, thuhet në një deklaratë për media të lëshuar nga Lëvizja Vetëvendosje. Atëbotë bëmë thirrje publikisht për pesë muaj rresht, që të hiqej nga ligjet e Kosovës përfaqësimi ndërkombëtar në borde e institucioneve publike, e veçanërisht në Bordin e Agjencionit të Privatizimit. Kjo me arsyetimin se përfaqësuesit ndërkombëtar në Borde gjithnjë do të përfaqësojnë interesat e shtetit prej nga vinë para se të përfaqësojnë interesat e qytetarëve të Republikës së Kosovës dhe se përfundimi i mbikëqyrjes nënkuptonte së pari largimin e tyre. Më 4 shtator 2012 u votua ligji që ndryshonte 21 ligje të ndryshme, e në të cilin u pranua nga deputetët e pozitës dhe opozitës, përveç Vetëvendosjes,  vazhdimi i kategorisë së ndërkombëtarit në ligjet e Kosovës, thuhet në deklaratën e Vetëvendosjes.

Në vazhdën e përgatitjeve për mbajtjen e zgjedhjeve komunale, kryetarja e Kosovës, Atifete Jahjaga, sot priti në një takim ambasadorin e OSBE-së në Kosovë, Jean-Claude Schlumberger. Në takim u bisedua kryesisht për angazhimin e këtij misioni në zgjedhjet komunale në vendin tonë. Me këtë rast, kryetarja Jahjaga, citohet të ketë thënë se zgjedhjet komunale do të mbahen brenda afatit ligjor në këtë vit. Sipas saj, zgjedhjet do të shpallen dhe mbahen në të gjithë territorin e Kosovës, duke shtuar se marrëveshja e Brukselit parasheh që zgjedhjet të mbahen edhe në katër komunat serbe në veri të vendit. Jahjaga ka vlerësuar angazhimin dhe ndihmën e OSBE-së, për të cilën tha se ka përvojë të mirë dhe përgatitjet e nevojshme teknike për të ndihmuar zgjedhjet që do të organizohen nga KQZ.

Shefi i delegacionit të BE-së në Serbi, Vincent Degert ka thënë se është e rëndësishme që BE të bindet se po fillon zbatimi i marrëveshjes së arritur ndërmjet Prishtinës dhe Beogradit. Ai ka deklaruar para gazetarëve në Beograd se marrëveshja është ‘historike’, por më e rëndësishme është fillimi i zbatimit të saj. Degert ka pranuar se ky është një proces i gjatë që kërkon disa muaj, por sipas tij “e rëndësishme është që të shihet se gjërat po lëvizin, që çështjet zgjidhen në drejtim të duhur”.