Shoqatat e dala nga lufta e UÇK-së  nga Mitrovica, Skënderaj, Drenasi  dhe Klina, gjatë një takimi të tyre të mbajtur,  sot,  në Skenderaj, kanë marrë vendim për të  organizuar një  protestë gjithëpopullore në mbrojtje të luftës dhe të udhëheqësve të saj.

Protesta do të mbahet të hënën në Prishtinë, me ç’rast u kërkua të marrin pjesë të paktën ata 57 mijë veta, të gjithë ata  të cilët edhe kanë aplikuar për të marrë statusin e veteranit.  Po ashtu, u vendos, që sot kryesitë e degëve të këtyre shoqatave të të gjitha komunave të Kosovës, të shkojnë para objektit të EULEX-it ku do të mbahet seanca gjyqësore, për të shprehur pakënaqësinë e tyre me arrestimet, të cilat po bëhen dhe janë bërë në bazë të dëshmive të bashkëpunëtorëve të Serbisë.

Hysni Ngucati, kryetar i degës së Organizatës së veteranëve në Skënderaj, propozoi që të gjithë bashkëpunëtorët shqipfolës të  EULEX-it të shpallen tradhtarë.

Smajl Elezi, nënkryetar i OVL- së UÇK-së në Kosovë, tha se arrestimet e fundit kanë goditur rëndë, jo vetëm ish-luftëtarët, por edhe gjithë popullin e Kosovës.  Duke u ndërlidhur me propozimin e Ngucatit për t’i shpallur tradhtarë bashkëpunëtorët e Serbisë dhe ata të EULEX-it, Elezi theksoi se më parë duhet të miratohet Ligji i Lustracionit, të hapen dosjet dhe të shihen njerëzit që kanë bashkëpunuar. Ky ligj nuk lejon bashkëpunëtorët e Serbisë të jenë askund nëpër institucione. Tani kemi raste, kur në polici, në prokurori, gjykata dhe institucione tjera publike punojnë njerëz që kanë qenë bashkëpunëtorë të Serbisë, apo djemtë e tyre, ka thënë Elezi.

Ndërkaq, Rafet Ibishi, përfaqësues i shoqatave të dala nga lufta të komunës së Mitrovicës, propozoi që kryesitë e të gjitha degëve të shoqatave të dala nga lufta të shkojnë në Prishtinë, para vendit ku do të nxirren para gjykatësve, të arrestuarit.  “Le të na marrin edhe neve, sepse nëse ata kanë bërë krime, kemi bërë edhe ne, edhe ne ishim pjesë e luftës. Në Prishtinë nuk do protestojmë vetëm për Sami Lushtakun dhe të tjerët nga Drenica, por edhe për gjykimet e udhëheqësve të UÇK-së të zonës së Llapit, të Fatmir Limajt dhe të ish-pjesëtarëve tjerë të UÇK-së. Lufta është bërë në gjithë Kosovën, ndërsa Sylejman Selimi ka qenë komandant i përgjithshëm i UÇK-së“, tha Ibishi.

Analisti i mirënjohur dhe drejtori i KMLDNJ-së në Kosovës,  Behxhet Shala, ka deklaruar se ndryshimet e ligjeve të Kosovës me kërkesë të Serbisë vetëm që t’u përshtaten kërkesave të tyre, është plan i përgatitur edhe më herët. Ai kujton deklaratën e kryetares,  Atifete Jahjaga, e cila para dy jave pati thënë se mund të ketë edhe ndryshime të Kushtetutës dhe ligjeve, e cila zgjoi reagime, e që siç shprehet Shala “presidentja e ka thënë atë që e ka ditur se do të ndodhë”. “Është për të ardhur keq që BE-ja, pranon çdo kërkesë të Serbisë, vetëm e vetëm që të arrijë qëllimin që ta fusë atë në shtëpinë evropiane”, tha Shala. “Na imponojnë edhe ndryshimet e ligjeve vetëm për shkak të rrethanave të reja që do vijnë me krijimin e asociacionit të komunave serbe në veri. Ndërkohë që deklaratat e palës kosovare se kinse çdo gjë po shkon sipas ligjeve e Kushtetutës së Kosovës janë vetëm për konsum të brendshëm. Se ndërkombëtarët e kanë prioritet Serbinë e jo Kosovën, ai përmend edhe një detaj, atë të vizitave të diplomatëve të huaj, të cilët sa herë që vizitojnë dy vendet, fillimisht ndalen në Beograd, dëgjojnë kërkesat e nevojat e tyre e më pas vijnë në Prishtinë dhe u prezantojnë kërkesat e serbëve.

Me rastin e ‘Javës së Tolerancës në Kosovë’, kryetari i Kuvendit, Jakup Krasniqi, ka thënë se populli shqiptar ka nevojë për mbështetje dhe solidaritet nga shteti i Izraelit. Ai ka deklaruar se në kuadër të shënimeve gjatë kësaj jave duhet të ngritet edhe një pllakë përkujtimore në respekt  të atyre që sakrifikuan për të mbrojtur hebrenjtë përballë inkuizicionit nazist. Krasniqi ka kërkuar gjithashtu nga shteti i Izraelit që të njohë pavarësinë e Kosovës. “Njoha e pavarësisë së Republikës së Kosovës nga shteti i Izraelit dhe solidariteti politik do të ishte në përputhje me të drejtën ndërkombëtare dhe do të ishte një mirënjohje ndaj popullit shqiptar të Kosovës”, ka nënvizuar pos të tjerash Krasniqi.

Komisioneri për zgjerim i BE-së, Stefan Fyle, ka vlerësuar se marrëveshja midis Kosovës dhe Serbisë ka ndryshuar perspektivën e krejt Ballkanit perëndimor drejt BE-së. Këto komente ai i bëri në hapje të konferencës për integrimin evropian të Ballkanit Perëndimor, që po mbahet në kryeqytetin e Irlandës, Dablin. Duke e cilësuar marrëveshjen si historike, Fyle ka thënë se vendet e rajonit duhet të përqendrohen në forcimin e sundimit të ligjit dhe kapërcimin e krizës ekonomike. Sipas komisionarit evropian, ato “nuk duhet të neglizhojnë as procesin e pajtimit dhe vendosjes së marrëdhënieve të mira fqinjësore”.

AAK përmes një komunikate për medie ka ngritur shqetësimin në lidhje me akuzat e ngritura ndaj udhëheqësve të UÇK-së nga ish-zona operative e Drenicës. Partia e drejtuar nga Ramush Haradinaj ka shprehur bindjen se edhe në këtë rast do të dëshmohet pastërtia e luftës së UÇK-së. “Lufta e popullit të Kosovës ishte e drejtë dhe ajo u zhvillua në përputhje të plotë me aspiratën tonë për liri, kurse u përmbyll në partneritet me NATO-n dhe vendet tjera mike të demokracisë perëndimore”, thuhet në komunikatë. AAK në vijim vlerëson se këto akuza të pabazuara ngritën mbi dyshime të pargumentuara, me qëllim efektin propagandistik dhe njollosjen e personaliteteve të ndryshme.