Shoqata e Vëllazërisë Kosovë-Malësi e Madhe “Martin Dreshaj” në takimin e jashtëzakonshëm me Kryesinë dhe anëtarët e saj ka analizuar gjendjen në fshatin Martinaj të Gucisë pas intervenimit brutal të policisë malazeze dhe arrestimit të 22 shqiptarëve nga ky fshat.

“Pogorica ka kohë që ka punuar për të krijuar atmosferë të rëndë e për të arritur qëllimin final të spastrimit të shumë vendbanimeve nga populli autokton shqiptar atje. Spastrime e pastaj kolonizime kanë ndodhur në Malësinë e Tuzit e të Plavë e Gucisë. Edhe projekti djallëzor ngritjes së një deponie të madhe buzë fshatit Martinaj kishte për qëllim që këtë vendbanim shqiptar e atë bukuri të madhe natyrore ta kthente vend që kundërmon dhe kështu t’i detyronte banorët e Martinajve që të iknin nga aty për të lëshuar kështu trojet stërgjyshore”, thuhet në reagimin e e Shoqatës së Vëllazërisë Kosovë-Malësi e Madhe “Martin Dreshaj”.

“Shqiptarët atje reaguan duke kërkuar drejtësi e mirëkuptim, por e keqja pushtetit malazez nuk ndal këtu. Ata kanë gjetur elemente ultranacionaliste serbe dhe i kanë joshur të shkojnë në fshatin,që me shekuj është i banuar vetëm nga shqiptarët,dhe të kërkojnë ngritjen e një kishte ortodokse në mes të fshatit Martinaj. Banorët e këtij fshati kanë dalë sot për të penguar uzurpatorët, por ultranacionalistët kanë gjetur mbështetjen e policisë malazeze,e cila ka përdorë dhunën dhe ka arrestuar 22 shqiptarë e për t’i dërguar në stacionin policor të Plavës”, thuhet në reagim.

“Shoqata jonë reagon ndaj këtij veprimi të policisë malazeze dhe i fton institucionet e Kosovës dhe Shqipërisë që të kërkojnë nga Podgorica zyrtare të respektojë të drejtat elementare të shqiptarëve atje dhe të garantojë e mbrojnë pronën private të tyre nga elementet nacionaliste e fashiste serbe”, thuhet mes tjerash në reagim.

Mjerisht për shqiptarët në Mal të Zi nuk kujdeset Tirana, e cila lavdëron Qeverinë malazeze, për fqinjësi të mirë, por as Prishtina zyrtare, e cila po përkujdeset që kjo pakicë koloniste sllave, në Kosovë të ketë statusin e pakicës kombëtare.

Policia speciale sllavomalazeze ka  arrestuar shqiptarët që nuk pranojnë të ndërtohet kisha ortodokse në fshatin e në pronat  e tyre, meqë ata i përkasin besimit islam dhe atij katolik.

Janë ndaluar në polici:

1. Isuf Bali Balidemaj (80) vjeçar

2. Selim Kamer Hasangjekaj (74)

3. Sherif Lan Hasangjekaj (70)

4. Bujar Hasangjekaj

5. Naim Prelvukaj

6. Lis Naim Prelvukaj

7. Shaban Sylë Balidemaj

8. Skender Hasangjekaj

9. Flamurdon Hasangjekaj

10. Hasan Prelvukaj

11. Valon Prelvukaj

12. Fatos Prelvukaj

13. Shaban Prelvukaj

14. Sadri Smajli Balidemaj

15. Ibish Balidemaj

16. Rexhe Balidemaj

17. Bali Rama Hasangjekaj

18. Sadik Rama Hasngjekaj

19. Luan Bajram Balidemaj

20. Martin Hasangjekaj

21. Ali Zeqiri Prelvukaj

22. Bekim Hasangjekaj

Një incident i rëndë është regjistruar dje në Shkup, ku është sulmuar me thikë një djalosh 13 vjeçar shqiptar. Raportohet se ngjarja ka ndodhur në orët e mbrëmjes kur maqedonas të maskuar e kanë sulmuar Blin Shabanin me thikë, duke i shkaktuar atij plagë në faqe dhe ballë. Babai, Kenan Shabani, ka sqaruar se djali i tij është sulmuar nga persona që flisnin maqedonisht. Sipas dëshmisë së tij, ata janë përpjekur ta detyrojnë djalin të puthte një kryq e në momentin kur ky ka refuzuar, ata e kanë therrë me thikë. Aktualisht, djaloshi 13 vjeçar, Blin Shabani, po trajtohet në Spitalin e Qytetit në Shkup. Mësohet se i njëjti ishte sulmuar edhe më herët nga grupe huliganësh maqedonas.

Në takimin e 10 të Evropës Juglindore të quajtur ‘Lutjet e Mëngjesit’ që po mbahet në Prishtinë, ka marrë pjesë edhe një zyrtar i lartë i MUP-it serb. Në fjalimin e tij, kryeministri Thaçi ka përshëndetur të pranishmin serb, por pa e përmendur emrin e tij. Mësohet se zyrtari serb është Vladimir Bozoviq, sekretar i Shtetit në Ministrinë serbe të Brendshme.

Aktivistë të degës së Vetëvendosjes në Gjilan sot kanë realizuar aksionin e radhës, ku kanë kritikuar qeverisjen lokale të Gjilanit për mos-përfundimin e projektit të ujësjellësit në fshatin Zhegër. Aktivistë të Vetëvendosjes kanë përkujtuar se në buletinin e investimeve kapitale në komunën e Gjilanit theksohet se për ndërtimin e rrjetit të ujësjellësit për fshatrat Zhegër dhe Budrikë janë shpenzuar 390 700 euro investime. Vetëvendosje ka theksuar se paratë po shpenzohen, por problemet nuk po zgjidhen. Në emër të fshatit Zhegër, ata kanë kërkuar përgjegjësi nga komuna për keqmenaxhimin e parasë publike.

Duke komentuar mbi largimet e fundit nga PDK, krye-kuvendari, Jakup Krasniqi ka thënë se këta njerëz po largohen me të njëjtën lehtësi me të cilën kanë hyrë brenda partisë. “Janë këta njerëz që realisht kanë hyrë në parti dhe kanë marrë pozita - si në parti ashtu edhe në institucione të vendit - pa asnjë angazhim dhe mund paraprak në kuadër të organizimeve politike. Kjo do të thotë se ata siç kanë hyrë lehtësisht ashtu edhe po dalin lehtësisht”, citohet të ketë thënë Krasniqi. Dorëheqje nga PDK kanë dhënë Ilir Mirena, Dukagjin Gorani e Shasivar Haxhiaj, ndërkohë që përflitet edhe për dorëheqjen e Berat Buzhalës, i cili ka shpeshtuar akuzat ndaj bashkëpartiakëve të tij.