AAK përmes një komunikate për medie ka ngritur shqetësimin në lidhje me akuzat e ngritura ndaj udhëheqësve të UÇK-së nga ish-zona operative e Drenicës. Partia e drejtuar nga Ramush Haradinaj ka shprehur bindjen se edhe në këtë rast do të dëshmohet pastërtia e luftës së UÇK-së. “Lufta e popullit të Kosovës ishte e drejtë dhe ajo u zhvillua në përputhje të plotë me aspiratën tonë për liri, kurse u përmbyll në partneritet me NATO-n dhe vendet tjera mike të demokracisë perëndimore”, thuhet në komunikatë. AAK në vijim vlerëson se këto akuza të pabazuara ngritën mbi dyshime të pargumentuara, me qëllim efektin propagandistik dhe njollosjen e personaliteteve të ndryshme.

Avokati, Tomë Gashi ka deklaruar se aktakuza për rastin e MTPT-së duhet të hidhet poshtë nga kryetarja e trupit gjykues, Ana Adamska Gallant. Sipas tij, ky proces është ndërtuar mbi bazën e disa sms-ve të falsifikuar. Ai ka thënë se ‘niveli i prokurorisë speciale nuk lejon që të ngritën aktakuza të tilla, të cilat nuk mund të vërtetohen fare’. Avokati Gashi ka thënë se pret që me 10 qershor, gjyqtarja e trupit gjykues të japë fjalën përfundimtare dhe kjo aktakuzë të hidhet poshtë për shkak se prokuroria nuk disponon asnjë fakt për këtë rast.

Kreu i AAK-së, Ramush Haradinaj citohet të ketë thënë se me arritjen e marrëveshjes në parim ka përfunduar gjithçka sa i përket zbatimit të marrëveshjes së arritur në Bruksel për normalizimin e marrëdhënieve midis Kosovës dhe Serbisë. Ai ka theksuar se vështirësitë kryesore politike janë tejkaluar. Sipas Haradinajt, kanë mbetur vetëm disa vështirësi praktike dhe marrëveshja do të mund të zbatohet në praktikë.

Shefi i ekipit të Serbisë në bisedimet teknike, Dejan Pavieçviq, ka mohuar të jetë takuar dje me ministrin e Jashtëm të Kosovës, Enver Hoxhaj. Në një prononcim për ‘Tanjug’, ai ka sqaruar se gatë ditës së djeshme është takuar vetëm me përfaqësuesin e lartë të BE-së, Samuel Zhbogar dhe me ekipin e Prishtinës që merret me zyrtarët ndërlidhës, por jo edhe me Enver Hoxhajn. Paviçeviq gjithashtu ka kritikuar deklaratën e Hoxhajt, duke thënë se nuk bëhet fjalë për hapje zyrash por vetëm për shkëmbim të zyrtarëve për ndërlidhje. Sipas tij “Ky është interpretimi që ka pranuar Beogradi, Brukseli dhe vetë Prishtina”.

Retorikës nacionaliste serbe i është bashkuar edhe patriarku rus, Kiril i cili ka deklaruar për mediet serbe se kisha ruse kurrë nuk do t’ia kthejë shpinën serbëve të Kosovës. Me porosinë që ‘Kosova kurrë nuk do të humbet”, patriarku rus ka thënë se rusët për kurrfarë çmimi nuk do të harrojnë lidhjen shumëshekullore me serbët. “Duhet t’iu përmbaheni të gjitha presioneve dhe momenteve të rënda, sepse Kosova, ky vend i shenjtë, dhe populli që jeton atje, nuk guxojnë të humbasin”, ka theksuar Kiril. Ai ka thënë se asnjë ndryshim politik nuk duhet t’i shtyjë rusët që të harrojnë lidhjen shumëshekullore shpirtërore me serbët.