Në një reagim të Organizatave të dala nga lufta e UÇK-së, thuhet se “për më shumë se një dekadë, ishim dëshmitar të dështimit total të drejtësisë ndërkombëtare në Kosovë. Administrata ndërkombëtare, përmes mekanizmave të ashtuquajtur të drejtësisë, vazhdimisht organizoi komplote kundër luftëtarëve të Ushtrisë Çlirimtare të Kosovës.  Organizatat e dala nga lufta e UÇK-së, vazhdimin e arrestit shtëpiak të z. Fatmir Limaj dhe bashkëluftëtarëve të tjerë në rastin e ashtuquajtur Kleçka e konsiderojmë të motivuar politikisht, të pa argumentuar dhe në kundërshtim me të gjitha praktikat ligjore.   Me këto veprime EULEX po dëshmon se nuk është këtu për të vendosur drejtësi por për të përndjekur luftëtarët e lirisë, prandaj edhe një herë ju bëjmë thirrje institucioneve vendore, që kërkesën tonë për heqjen e mandatit ekzekutiv të EULEX-it, ta marrin seriozisht, thuhet mes tjerash në deklaratën e OVL të UÇK-së.

Në vazhdën e aktiviteteve kundër miratimit të Marrëveshjes Thaçi-Daçiq, Vetëvendosje sot ka publikuar numrat e të gjithë deputetëve të Kuvendit të Kosovës. Përmes një komunikate për medie, Vetëvendosje u ka bërë thirrje qytetarëve të Kosovës që t’u dërgojnë mesazhe deputetëve për të ndalur miratimin e marrëveshjes me Serbinë. “Unë si qytetar/e i Kosovës ju kërkoj që të respektoni detyrën që keni si deputet i Kuvendit tonë, pra të mos ta votoni legalizimin e Serbisë në Kosovë duke ratifikuar e Marrëveshjen Thaçi-Daçiq”, është njëri nga sugjerimet e Vetëvendosjes për qytetarët që vendosin t’i dërgojnë mesazhe deputetëve. Vetëvendosje, secili prej qytetarëve duhet të bëjë përpjekje sa kolektive aq edhe individuale për të ndaluar votimin e kësaj marrëveshje.

Në komunikatën e Lëvizjes Vetëvendosje lidhur me shtyrjen e seancës plenare për ratifikimin e marrëveshjes, Kosovë-Serbi thuhet se “ndërkohë mësuam se Kryeministri ka kërkuar zyrtarisht shtyrjen e ratifikimit të Marrëveshjes Thaçi-Daçiç. Kjo marrëveshje ka qenë e planifikuar të shqyrtohej në seancë plenare në Kuvendin e Kosovës të enjten, në datën 20 qershor, datë në të cilën Lëvizja Vetëvendosje me krejt strukturat e saj i ka thirrur qytetarët e Kosovës në një demonstratë, për ta kundërshtuar këtë ratifikim.”, thuhet në një kumtesë të VV-së. Sipas Lëvizjes, shtyrja e datës së ratifikimit është përpjekje e Qeverisë së Kosovës për të mos u përballur me qytetarët e angazhuar në demonstratë, me shpresën se ata do të lodhen dhe gatishmëria e tyre nuk do të jetë në të njëjtin nivel. “Kjo shtyrje kërkohet me arsyetimin zyrtar se kryeministri e bashkëpunëtorët e tij do të shkojnë në Bruksel ditën e enjte, për të vazhduar negociatat. Kjo na e dëshmon edhe një herë se kjo marrëveshje nuk shënon fundin e negociatave, por vetëm një hap të ndërmjetëm në një proces të gjatë. Ky proces tashmë është e qartë se nuk ka për synim të çojë në njohjen e Kosovës nga Serbia, por vetëm në plotësimin e interesave të pandryshuara të Serbisë në Kosovë”.

Kryeministri i Kosovës, Hashim Thaçi sot u priti në një takim ministren e Jashtme të Italisë, Emma Bonino. Gjatë takimit u bisedua kryesisht për zhvillimet politike në Kosovë, me theks të posaçëm zbatimin e marrëveshjes së 19 prillit për normalizimin e marrëdhënieve me Serbinë. Duke dhënë një rezyme të të arriturave në vend pas shpalljes së pavarësisë, kryeministri Thaçi foli edhe mbi rëndësinë e zbatimit të marrëveshjes, e cila sipas tij do të krijojë mundësinë për zhvillimin ekonomik dhe funksionimin e institucioneve legjitime në veri të Kosovës. Ndërkaq, kryediplomatja italiane, Emma Bonino çmoi përkushtimin e Qeverisë së Kosovës për zbatimin e marrëveshjes për normalizimin e marrëdhënieve. Sipas saj, ky është një hap i rëndësishëm dhe historik, në të mirë të forcimit të paqes, stabilitetit dhe bashkëpunimit rajonal.

Kosova dhe Italia sot kanë nënshkruar një marrëveshje për bashkëpunim juridik ndërkombëtar, ekstradim dhe ndihmë të ndërsjellë në çështje penale. Marrëveshja u nënshkrua nga ministri i Drejtësisë, Hajredin Kuçi dhe ministrja e Jashtme Italiane, Emma Bonino. Nënshkruesit thanë se marrëveshja është në funksion të luftimit të kriminalitetit transnacional. Në bazë të saj, palët duhet të ketë bashkëpunim sa i përket fushës së ekstradimit dhe t’i ofrojnë njëra tjetrës të gjitha masat e nevojshme të ndihmës ligjore në çështjet penale.