Nëpërmjet një komunikate për medie, Lëvizja për Bashkim e ka quajtur si lojë hipokrite të Qeverisë zvarritjen e jetësimit të rezolutës së miratuar në Kuvend për zëvendësimin e tri kodeve aktuale telefonike me kodin e Shqipërisë +355. Miratimi i kësaj rezolute ishte pasuar me një takim me përfaqësues të Qeverisë shqiptare, me ç’rast ishte nënshkruar një memorandum për bashkëpunim, ku pos të tjerash parashihte edhe angazhimin për jetësimin e një kodi të përbashkët telefonik midis Kosovës dhe Shqipërisë. Por, lëvizja e drejtuar nga Avni Klinaku ka thënë se ende nuk janë formuar grupet punuese që do të angazhoheshin për zbatimin e kësaj rezolute. “Duke qenë pjesë të procesit, edhe përkundër insistimit tonë të vazhdueshëm për ta shtyrë atë përpara, ka ndodhur një zvarritje e panevojshme nga ana e institucioneve të Kosovës. Në ndërkohë, nga udhëheqësja e delegacionit të Kosovës në bisedimet për çështje teknike, kuptuam se është afër marrëveshja me Serbinë që Kosova të mos pengohet nga kjo e fundit për të pasur kodin e vet telefonik, me kushtin që Serbisë t’i lejohet një operator në Kosovë”, thuhet në komunikatën e LB-së. Kjo lëvizje ka tërhequr vërejtjen se vazhdimi i kësaj situatë me tri kode telefonike i shkakton Kosovës humbje të mëdha ekonomike.

Sekretari i Përgjithshëm i LDK-së, Ismet Beqiri, ka kërkuar nga kryetarja e vendit që ta shpallë datën e zgjedhjeve lokale jo më larg se në fund të muajit shtator të këtij viti. Sipas tij, fundi i shtatorit do të ishte afati optimal për mbajtjen e zgjedhjeve në mënyrë që të shmangen parregullsitë e mundshme. Përndryshe, Beqiri është shprehur mjaft optimist se LDK do t’i fitojë shumicën e komunave të Kosovës. Ai ka refuzuar të japë ndonjë koment se cili do të jetë kandidati i ardhëm i kësaj partie për kryeqytetin. Beqiri ka akuzuar qeverinë se po pengon në realizimin e projekteve të komunës së Prishtinës.

Gjatë takimit të fundit me përfaqësuesit e serbëve të veriut të Kosovës, zëvendëskryeministri serb, Aleksandar Vuçiq, ka paralajmëruar mundësinë e investimeve kapitale nga Serbia në këtë pjesë. Madje gjatë këtij takimi fare pak është diskutuar zbatimi i marrëveshjes së arritur në Bruksel. Vuçiq ka premtuar se Serbia do të ndajë mjete për ndërtimin e një rrjeti rajonal të ujësjellësit, objekteve vitale si dhe tri urave në komunën  e Leposaviqit. Në takim është hedhur edhe ideja e krijimit të një ndërmarrje të madhe publike, e cila do të mbikëqyrte të gjitha projektet që zbatohen në veri të Kosovës.

Kontrata për investime në Trepçë, e cila është nënshkruar nga Qeveria e Serbisë dhe konsorciumi amerikan ‘New Generation Power’, do të mbetet edhe më tutje në fuqi, njoftojnë mediet serbe. Ministri serb i Planifikimit Hapësinor dhe Xehtarisë, Millan Baçeviq ka thënë se kontratën e nënshkruar nuk mund ta ndryshojë Qeveria e Kosovës, pavarësisht qëndrimit të Departamentit të Shtetit, i cili ka këshilluar investitorin amerikan që t’i drejtohet Qeverisë së Kosovës në lidhje me këtë çështje. Baçeviq ka theksuar se “është sukses i Qeverisë së Serbisë që ka gjetur dikë i cili kupton peshën e “Trepçës” dhe çfarë janë raportet”. Ndërkohë nga Agjencia Kosovare e Privatizimit kanë thënë se kontrata me konsorciumin amerikan është e paligjshme dhe e pazbatueshme.

Beogradi këmbëngul që në vend të strukturave paralele në Kosovë të formohet e ashtuquajtura bashkësi konstitutive e komunave serbe. Kërkesa tjetër e palës serbe është që Kosova t’i ndryshojë rreth 30 ligje në mënyrë që asociacioni të marrë kompetenca konkrete, ashtu sikundër parashihet në marrëveshje. Sipas propozimeve të Beogradit, kjo zgjidhje kalimtare do të zgjaste të paktën deri në vjeshtë, kur pritet të mbahen zgjedhjet lokale. Por, kryeministri Thaçi, këmbëngul që të shuhen strukturat paralele, ndërsa në harkun kohore deri në mbajtjen e zgjedhjeve lokale, Prishtina të shtrijë autoritetin e saj edhe në veri.