Në kumtesën e ambasadës së Amerikës në Prishtinë,  pasi sqarohet se Qeveria e Shteteve të Bashkuara e njeh Kosovën si shtet të pavarur dhe sovran, bëhet e ditur se “derisa ambasada e Amerikës në Prishtinë nuk është marrë me “New Power Generation”, zyrtarë të Departamentit të Shtetit në Uashington, e kanë këshilluar këtë kompani, se Kosova është shtet sovran dhe se Qeveria e Serbisë nuk ka juridiksion mbi kompleksin e minierave të Trepçës”. “Departamenti i Shtetit, po ashtu, inkurajoi kompaninë “New Power Generation”, që të kontaktojë me Qeverinë e Kosovës për të diskutuar lidhur me investimin, që e ka propozuar”.

Në fund të kumtesës për media, nënvizohet  se rruga para kompleksit të minierave të Trepçës është sfiduese dhe do të vazhdojmë të rekomandojmë, që investuesit potencialë nga SHBA-të të hulumtojnë tërësisht ndërmarrjen dhe statusin e saj”. Mediet në Beograd, kanë njoftuar opinionin se Ministria për Miniera dhe Resurse Natyrore të Serbisë ka nënshkruar një marrëveshje me konsorciumin amerikan “New Power Generation” për bashkëpunimin të biznesit dhe teknik në Kombinatin “Trepça”, në veri të Mitrovicës.

Me të arritur në Prishtinë, shefi i diplomacisë gjermane, Guiido Vestervgele, ka zhvilluar një takim me kryeministrin, Hashim Thaçi. Me këtë rast, Vestervele ka thënë se pret që në takimin e radhës, palët të bijnë në ujdi për zbatimin e marrëveshjes së arritur në prill. Ai ka theksuar se strukturat paralele në veri të Kosovës duhet të largohen. “E kemi bërë të qartë gjatë vizitës në Beograd se duhet të ketë shpërbërje të strukturave ilegale në veri të Kosovës dhe të ketë hapa të tjerë konkretë për zbatimin e kësaj marrëveshje historike për rajonin dhe më gjerë për Evropën”, ka saktësuar Vestervele në konferencën për gazetarë. Por ai ka kërkuar edhe nga Kosova që të ofrojë lehtësira për qytetarët serbë në veri, në mënyrë që të mundësohet integrimi i tyre. Në anën tjetër, kryeministri Thaçi ka thënë se pjesa më e vështira sa i përket marrëveshjes politike tashmë është tejkaluar dhe mbetet vetëm zbatimi.

Pak para nisjes në Bruksel, kryeministri Hashim Thaçi, ka zhvilluar një takim me kryetaren e vendit, Atifete Jahjaga, të cilën e ka njoftuar mbi zbatimin e marrëveshjes së arritur në Bruksel. Thaçi ka shfaqur shpresën se në takimin e nesërm me homologun e tij serb do të arrihet plani për zbatimin e marrëveshjes. Ai ka përmendur edhe çështjen e mbajtjes së zgjedhjeve komunale, të cilat sipas tij, do të mbahen në të njëjtën ditë në të gjithë territorin e Republikës së Kosovës. Thaçi nënvizoi se zbatimi i marrëveshjes që ka të bëjë me policinë, drejtësinë dhe çështjet e tjera do të bëhet në përputhje me ligjet dhe Kushtetutën e Kosovës. Në anën tjetër, kryetarja Jahjaha, ka shprehur edhe njëherë mbështetjen për marrëveshjen e arritur, për të cilën ka thënë se do të jetë në interesin e të gjithë qytetarëve pa dallim. Ajo ka vlerësuar se zgjidhja më e mirë është mbajtja e zgjedhjeve brenda këtij viti në përputhje me mandatin aktual. Sipas Jahjagës shpallja e datës së zgjedhjeve duhet të bëhet brenda afatit të caktuar ligjor si dhe duke pasur parasysh vullnetin e partive politike.

Serbia duhet t’i japë fund lojës së nervave, me anë të së cilës përpiqet të konsumojë kohën, ka deklaruar kryetari i AAK-së, Ramush Haradinaj. Ai ka deklaruar se si Serbia ashtu edhe Kosova kanë hyrë në një rrugë njëdrejtimëshe, duke shtuar se ato janë të detyruara të zbatojnë marrëveshjen. Haradinaj ka vlerësuar se as Beogradi nuk ka kohë të vonojë zbatimin si pasojë e kërkesave të qarta të Brukselit. Ai ka thënë se gjatë zbatimit të marrëveshjes “ne duhet të jemi shumë të kujdesshëm , që t’i japim kualitet në përputhje me interesat tona, me kushtetutën dhe ligjet e vendit dhe të mundësojmë që integrimi i veriut, të bëhet në përputhje me kushtetutën dhe ligjet e vendit”.

Kryetari i Prishtinës, Isa Mustafa, sot ka zhvilluar një takim me zëvendëskomandantin e KFOR-it, Bojan Pograjca, me të cilin ka biseduar kryesisht mbi zhvillimet politike në vend. Në takim u fol edhe për çështjen e marrëveshjes së nënshkruar midis Kosovës dhe Serbisë. Me këtë rast, kreu i LDK-së, Isa Mustafa, e ka cilësuar si mëse të nevojshme fillimin e zbatimit praktik të marrëveshjes. Në anën tjetër, përfaqësuesi i KFOR-it në takim, shprehu gatishmërinë e këtij misioni që të kujdeset për sigurinë në vend, si në veri ashtu edhe në pjesët e tjera të Kosovës. Gjatë takimit, Mustafa, ka shprehur falënderimin ndaj KFOR-it, i cili ka ndihmuar në realizimin e disa projekteve infrastrukturore, shërbimeve publike dhe në edukim.