Dje në Skënderaj është mbajtur  protesta kundër arrestimit të disa komandantëve të njohur të luftës në Zonën Operative të Drenicës. Protesta, në shënim të Ditës së Çlirimit, është zhvilluar e qetë dhe pa incidente, ndërkohë që protestuesve iu kanë bashkuar shumica dërrmuese e qytetarëve të Skënderajt.  Veteranët dënuan ashpër arrestimet e ish komandantëve të UÇK për këtë zonë, përderisa thanë se ato janë të padrejta. Protestuesit nga Drenica kërkuan që t’i hiqet mandati  EULEX-it në Kosovë, përderisa ky mision nuk ka shqiptuar asnjë  dënim për kriminelët serbë që kanë kryer maskra të çmeritura kundër popullatës civile gjatë luftës në Kosovë.

EULEX-i po vazhdon me intensitet fushatën kundër vlerave të luftës së UÇK-së, duke e shpallur luftën çlirimtare si luftë kriminale, me qëllim për të trimëruar kriminelët serbë të kthehen në Kosovë. Protestat e veteranëve aktualisht janë të shkëputura dhe në to po marrin pjesë kryesisht  luftëtarët e Drenicës, ndërkohë që misioni i EULEX-it ka paralajmëruar edhe arrestime të tjera, duke u mbështetur në dosjet e regjimit të Milosheviqit, i cili luftën tonë çlirimtare, të përkrahur nga bota përparimtare dhe NATO-ja  e quante luftë terroriste, ashtu sikur aktualisht e kualifikon edhe bashkëbiseduesi i kryeministrit, Hashim Thaçit, Ivica Daçiq.

Avokati i Popullit, Sami Kurteshi, në vazhdimësi e  ka përcjellë rrjedhën e grevës së urisë, e cila po mbahet në ambient të hapur në Prishtinë, që nga data 31 maj 2013. Bazuar në kohëzgjatjen e grevës së urisë, e cila ka hyrë tashmë në ditën e tetëmbëdhjetë, i shqetësuar për shëndetin e grevistëve, ai sot ka vizituar ata në vendin ku po mbahet greva.  Kurteshi është interesuar për gjendjen shëndetësore të grevistëve dhe i ka lutur ata që të shqyrtojnë mundësinë e ndërprerjes së grevës, thuhet në një komunikate nga ky institucion. Edhe pse deklarimi i tyre ishte se ndjehen mirë me shëndet, nga pamja e jashtme e tyre mund të konstatohet se ka shenja të lodhjes dhe dehidratimit. Kjo gjendje rëndohet edhe më shumë me rritjen e temperaturave.

Avokati i Popullit është i shqetësuar se deri më tani institucionet e shëndetit publik nuk kanë ofruar përkujdesin e domosdoshëm dhe të obligueshëm shëndetësor në të tilla raste, përfshirë edhe informacionin e domosdoshëm  për pasojat në shëndetin e pjesëmarrësve të grevës së urisë dhe mënyrës se si po zhvillohet ajo.

Në një intervistë për gazetën austriake “Die Presse”, kryeministri i Kosovës, Hashim Thaçi ka deklaruar se nuk do të ketë këmbim territoresh mes Kosovës dhe Serbisë dhe  as ‘Shqipëri të madhe, duke  kritikuar Serbinë, e cila sipas tij  po shfaq një tendencë për të zvarritur procesin, mirëpo Thaçi është i bindur se  zbatimi i marrëveshjes nuk ka alternativë.  Ai vlerësuar se takimet e zhvilluara mes tij dhe homologut të tij serb, Ivica Dacic kanë qenë në funksion të stabilitetit, paqes dhe krijimit të fqinjësisë së mirë midis dy vendeve.  Marrëveshja e arritur për normalizimin e marrëdhënieve Kosovë-Serbi është bërë pas një konflikti 100- vjeçar, ka vlerësuar kryeministri për gazetën vjeneze “Die Presse”.

Kosova dhe Serbia, sipas tij kanë lënë prapa të kaluarën dhe tani kanë bërë një agjendë që i shërben të ardhmes jo vetë për të dy vendet, por edhe për gjithë rajonin, meqë marrëveshja është në shërbim të serbëve që jetojnë në veri të Kosovës.  Pavarësisht këtyre deklarimeve entuziaste të kryeministrit, tashmë dihet botërisht se marrëveshja për normalizimin e marrë dhënieve ia ka mundësuar Serbisë praninë në Kosovë dhe kjo prani e legjitimuar me nënshkrimin e tij, Serbia do të krijojë entitetin e vet në Kosovë, ashtu sikur e ka krijuar në Bosnje. Më rëndësi është se nuk do të krijohet “Shqipëria e Madhe” dhe tri komunat shqiptare të mbeten në Serbinë, territorialisht  dhjetë herë më të madhe sesa Kosova.

Edhe pse parti në opozitë dhe deklarativisht shumë e ashpër kundër Qeverisë dhe PDK-së, Lidhja Demokratike e Kosovës e ka përkrahur marrëveshjen, e cila është trajtuar në Kuvendin e Republikës së Kosovës”, ka thënë Mustafa, në një prononcim për Radion Evropa e Lirë. LDK do ta ratifikojë këtë marrëveshje në Kuvend sepse e konsiderojmë si një hap të rëndësishëm i stabilizimit të gjendjes në Kosovë dhe përmirësimit të marrëdhënieve me Serbinë, ka thënë Mustafa. Tutje ai ka sqaruar se procedura e ratifikimit nuk ka pse t’i nënshtrohet ndonjë seance të jashtëzakonshme, siç kishte rrjedhë si ide nga Partia Demokratike e Kosovës. Ne do ta ratifikojmë marrëveshjen por, e konsiderojmë se çështja është e zakonshme dhe nuk është e jashtëzakonshme, kështu që ne do të kërkojmë që ratifikimi të bëhet të enjten në seancën e rregullt të Kuvendit të Kosovës”, ka deklaruar Mustafa.