Në vazhdën e përgatitjeve për mbajtjen e zgjedhjeve komunale, kryetarja e Kosovës, Atifete Jahjaga, sot priti në një takim ambasadorin e OSBE-së në Kosovë, Jean-Claude Schlumberger. Në takim u bisedua kryesisht për angazhimin e këtij misioni në zgjedhjet komunale në vendin tonë. Me këtë rast, kryetarja Jahjaga, citohet të ketë thënë se zgjedhjet komunale do të mbahen brenda afatit ligjor në këtë vit. Sipas saj, zgjedhjet do të shpallen dhe mbahen në të gjithë territorin e Kosovës, duke shtuar se marrëveshja e Brukselit parasheh që zgjedhjet të mbahen edhe në katër komunat serbe në veri të vendit. Jahjaga ka vlerësuar angazhimin dhe ndihmën e OSBE-së, për të cilën tha se ka përvojë të mirë dhe përgatitjet e nevojshme teknike për të ndihmuar zgjedhjet që do të organizohen nga KQZ.

Shefi i delegacionit të BE-së në Serbi, Vincent Degert ka thënë se është e rëndësishme që BE të bindet se po fillon zbatimi i marrëveshjes së arritur ndërmjet Prishtinës dhe Beogradit. Ai ka deklaruar para gazetarëve në Beograd se marrëveshja është ‘historike’, por më e rëndësishme është fillimi i zbatimit të saj. Degert ka pranuar se ky është një proces i gjatë që kërkon disa muaj, por sipas tij “e rëndësishme është që të shihet se gjërat po lëvizin, që çështjet zgjidhen në drejtim të duhur”.

Në prag të takimit midis kryeministrave Thaçi e Daçiq në Bruksel, eurodeputetja, Doris Pack, ka theksuar se ata duhet të gjejnë mënyrën për zbatimin e marrëveshjes së nënshkruar me 19 prill. Sipas saj, zbatimi i marrëveshjes do të ishte në interesin më të mirë të të dyja vendeve. Edhe raportuesi evropian për Serbinë, Jelko Kacin ka deklaruar për Deutche Welle se pret nga takimi i sotëm që të ketë bisedime edhe për çështje të tjera pas 1 korrikut, dita kur Serbia pritet ta marrë dritën jeshile për anëtarësim në BE.

Në bazë të një njoftimi të prokurorisë serbe bëhet e ditur se sot është arrestuar një pjesëtar aktiv i xhandarmërisë serbe dhe një person tjetër, që ngarkohen për krime lufte ndaj popullsisë civile shqiptare në fshatin Lybeniq në Kosovë gjatë periudhës prill-maj të vitit 1999. Të arrestuarit e sotëm së bashku me tre të dyshuar të tjerë kanë kryer krime të rënda ndaj 65 civilëve shqiptarë si dhe kanë transferuar mbetjet mortore të të vrarëve nga Lybeniqi në varrezën masive në Batajnicë në afërsi të Beogradit. Ndonëse Prokuroria serbe nuk ka dhënë hollësi të tjera për rastin, mësohet se dëshmitë për këtë lëndë janë siguruar në bazë të dëshmive të shumë dëshmitarëve që kanë qenë pjesëmarrës të drejtpërdrejtë në ngjarjet e përmendura.

Sot u mbajt seanca e radhës e procesit gjyqësor ndaj Fatmir Limajt dhe nëntë bashkëluftëtarëve të tij për rastin e fabrikuar ‘Kleçka’. Edhe dëshmitari i radhës, me shifrën e koduar ‘M’, ka demantuar prokurorin Salustro, duke thënë se ai kishte qenë në presion nga EULEX-i kur ishte intervistuar nga prokurorët dhe hetuesit e këtij misioni. Dëshmitari M përmes videolinkut ka shpjeguar gjer e gjatë  mënyrën sesi EULEX-i e kishte marrë me forcë nga shtëpia e tij, e kishte dërguar në një kodër 15 km larg fshatit Mirushë, me ç’rast e kanë detyruar të nënshkruajë deklaratën. Ky dëshmitar ka pranuar se ka qenë në Kleçkë, por ka mohuar të ketë qenë i burgosur.