Kontrata për investime në Trepçë, e cila është nënshkruar nga Qeveria e Serbisë dhe konsorciumi amerikan ‘New Generation Power’, do të mbetet edhe më tutje në fuqi, njoftojnë mediet serbe. Ministri serb i Planifikimit Hapësinor dhe Xehtarisë, Millan Baçeviq ka thënë se kontratën e nënshkruar nuk mund ta ndryshojë Qeveria e Kosovës, pavarësisht qëndrimit të Departamentit të Shtetit, i cili ka këshilluar investitorin amerikan që t’i drejtohet Qeverisë së Kosovës në lidhje me këtë çështje. Baçeviq ka theksuar se “është sukses i Qeverisë së Serbisë që ka gjetur dikë i cili kupton peshën e “Trepçës” dhe çfarë janë raportet”. Ndërkohë nga Agjencia Kosovare e Privatizimit kanë thënë se kontrata me konsorciumin amerikan është e paligjshme dhe e pazbatueshme.

Beogradi këmbëngul që në vend të strukturave paralele në Kosovë të formohet e ashtuquajtura bashkësi konstitutive e komunave serbe. Kërkesa tjetër e palës serbe është që Kosova t’i ndryshojë rreth 30 ligje në mënyrë që asociacioni të marrë kompetenca konkrete, ashtu sikundër parashihet në marrëveshje. Sipas propozimeve të Beogradit, kjo zgjidhje kalimtare do të zgjaste të paktën deri në vjeshtë, kur pritet të mbahen zgjedhjet lokale. Por, kryeministri Thaçi, këmbëngul që të shuhen strukturat paralele, ndërsa në harkun kohore deri në mbajtjen e zgjedhjeve lokale, Prishtina të shtrijë autoritetin e saj edhe në veri.

Kërkesa e Aleancës Kuqezi për mbajtjen e një referendumi për bashkimin e Shqipërisë më Kosovën do të shqyrtohet tre muaj pas zgjedhjeve parlamentare të 23 qershorit. Kryetarja e KQZ-së, Lefterie Lleshi ka thënë se nuk mund të zhvillohet referendum kushtetues  apo i përgjithshëm “gjatë periudhës nga gjashtë muaj para përfundimit të mandatit të Kuvendit, deri tre muaj pas mbledhjes së parë të Kuvendit të ri”. Në letrën e saj, ajo ka sqaruar se kërkesa për fillimin e procedurave për mbajtjen e referendumit do të shqyrtohet në afatin e paraparë me ligj nga KQZ-ja. Në lidhje me këtë rast, drejtuesi i AK, Kreshnik Spahiu ka vlerësuar se ky vendim i KQZ i jep dritën jeshile mbajtjes së referendumit. Ai ka theksuar se presioni i brendshëm dhe ai i jashtëm kanë bërë që të shtyhet për disa muaj shqyrtimi i idesë për mbajtjen e referendumit. Nisma e kuqezinjve për këtë referendum ishte bërë publike me 28 nëntor të vitit të kaluar, me rastin e 100 vjetorit të Pavarësisë. Në këtë nismë parashikohet që zgjedhësit të pyetën për t’u përgjigjur me ‘Po’ ose ‘Jo’ në lidhje me bashkimin e Shqipërisë dhe Kosovës në një shtet të përbërë federativ.

Partia maqedonase ‘Dinjiteti’, e njohur për qëndrimet e saj nacionaliste, ka kërkuar nga ministri i Drejtësisë, Blerim Bexheti si dhe nga BDI që të ushtrojnë trysni diplomatike ndaj Kosovës për siç ka thënë, ekstradimin e dy të dyshuarve për rastin ‘Monstra’, gjegjësisht për vrasjen e pesëfishtë që kishte ndodhur në Smilkovc të Shkupit në prill të vitit të kaluar. Ky subjekt politik, i cili në radhët e tij tubon kryesisht veteranë të Ushtrisë maqedonase, ka thënë se nuk do të lejojnë që shteti i dytë i shqiptarëve të luajë me shtetin e vetëm të maqedonasve. Në anën tjetër, ministri i Drejtësisë, Blerim Bexheti ka kërkuar që të shmangen të gjitha supozimet dhe paragjykimet e gabuara në lidhje me ekstradimin e të dyshuarve. Sipas tij, Maqedonia ka marrë të gjitha procedurat e nevojshme për ekstradim, i cili do të ndodhë në përputhje me marrëveshjet dypalëshe.

Vetëvendosje shprehet optimiste se në zgjedhjet e ardhshme lokale do të jetë një alternativë serioze. Sekretari organizativ, Dardan Molliqaj, ka thënë se Vetëvendosje do të shënojë rritje të madhe dhe në shumicën e komunave do të shkoj në balotazh. Ai ka përjashtuar çfarëdokoalicioni me PDK-në, LDK-në, AAK-në dhe AKR-në.