Kryetari i Shoqatës së Familjeve të Dëshmorëve të UÇK-së, Xhavit Jashari, ka kërkuar që EULEX-it t’i hiqet mandati ekzekutiv. Në një prononcim për ditoren ‘Epoka e Re’, ai u ka bërë thirrje institucioneve të vendit që ta rishikojnë mandatin e këtij misioni. Sipas tij, EULEX-i është duke bërë padrejtësi të mëdha, meqë përpiqet ta barazojë luftën dhe ish-luftëtarët e UÇK-së me luftën e kriminelëve të Serbisë.

Kosova me një pako ligjore kurse Serbia me ligjin kushtetues do të fillojnë përpjekjet për zbatimin në praktik të marrëveshjes për veriun, të nënshkruar me 19 prill në Bruksel. Qeveria e Kosovës në mbledhjen e saj të djeshme ka miratuar planin e zbatimit në parim të kryeministrave Thaçi dhe Daçiq. Të njëjtin pritet ta procedojë për miratim në Kuvend. Në lidhje me këtë, Qeveria e Thaçit pritet që të lobojë tek partitë opozitare në mënyrë që të sigurojë mbështetjen e tyre për ligjet që do të ndryshohen me urgjencë për t’iu përshtatur zbatimit të marrëveshjes. Në anën tjetër, Qeveria serbe thuhet se do të ndërmarrë një tjetër fushatë me serbët e veriut në përpjekje të neutralizimit të kundërshtimeve ndaj zbatimit të marrëveshjes.

Maqedonia ka plotësuar kërkesat e Beogradit, duke mos e ftuar Kosovën në Samitin e Procesit për Bashkëpunim në Evropën Juglindore që do të mbahet në Ohër. Përkundër këmbënguljes së Ministrisë së Jashtme të Kosovës, Maqedonia nuk e ka ftuar kryetaren e Kosovës, Atifete Jahjaga apo ndonjë zyrtar tjetër. Kjo ka nxitur reagimin e ministrit të Jashtëm, Enver Hoxhaj, i cili këtë sjellje të Maqedonisë e ka cilësuar si jo-evropiane. Ai ka thënë se mungesa e ftesës “paraqet një shqetësim real për relacionet mes Kosovës dhe Maqedonisë meqë është kundër frymës së bashkëpunimit rajonal”.

Në bazë të regjistrimit të popullsisë del që rreth 137 mijë qytetarë të Kosovës hyjnë në kategorinë e analfabetëve. Këto statistika alarmante i ka bërë të ditur Agjencia e Statistikave të Kosovës, sipas të cilës, 55 mijë qytetarë janë krejtësisht analfabetë që nuk dinë as shkrim as lexim, kurse 82 mijë qytetarë të tjerë dinë të lexojnë por nuk dinë të shkruajnë. Sipas ekspertëve të arsimit del që shumica e analfabetëve të regjistruar në mes të moshës 10 dhe 24 vjeç i përkasin kryesisht gjinisë mashkullore. Ekspertët theksojnë se nuk bëhet fjalë për konservatorizëm të familjeve, siç mendohet shpesh, por për problemet ekonomike me të cilat përballen ato familje. Jonuz Salihaj ka fajësuar Ministrinë e Arsimit për këto shifra alarmante, duke thënë se nuk është bërë sa duhet për këtë kategori. “Asnjëherë deri më tani nuk kanë organizuar kurse speciale për këtë kategori”, ka thënë Salihaj. Në anën tjetër, Arbër Morina, zëdhënës i Ministrisë së Arsimit, ka theksuar se analfabetizmi më tepër është i lidhur me numrin e braktisjes së shkollimit. “Sipas Statistikave të Ministrisë së Arsimit, Shkencës dhe Teknologjisë në vitin shkollor 2002/2003 shkollimin e kanë braktisur 1,67 për qind e nxënësve, ndërsa në vitin shkollor 2011/2012 braktisja e nxënësve ka rënë në 0,5 për qind, që d.m.th se shkalla e braktisjes ka rënë shumë”, ka sqaruar Morina. Ai ka saktësuar se shumë prej atyre që e braktisin shkollimin, këtë e bëjnë si pasojë e shkaqeve ekonomike.

Përfaqësuesja e ambasadës amerikane në Bordin e Agjencisë Kosovare të Privatizimit nuk është kthyer në këtë pozitë as pas dorëheqjes së kryetarit të këtij agjencioni, Blerim Rexha. Burime të gazetës ‘Express’ mësojnë se përfaqësuesit amerikan do të kthehen në AKP, vetëm kur Qeveria të dërgojë njerëz kompetentë dhe profesionistë në këtë agjenci. Zyrtarja amerikane, Bernadette Roberts, ishte tërhequr nga Bordi i Drejtorëve të AKP-së, pas vërejtjeve të ambasadës amerikane ndaj kryetarit të Bordit, Blerim Rexha. Ndërkohë, Qeveria pritet që së shpejti të dërgojë për miratim në Kuvendin e Kosovës emrat për drejtorë të Bordit të AKP-së.