Zyrtarët e informimit të EULEX-it kanë bërë të ditur se policët e këtij misioni së bashku me policët shqiptarë të Njësisë së Operacioneve Speciale të Policisë së Kosovës kanë arrestuar disa ish eprorë të lartë të Ushtrisë Çlirimtare të Kosovës në Zonën e Drenicës. Në informatë thuhet se  pesë veta janë duke u hetuar për krime lufte kundër popullsisë civile në formën e dhunimit të integritetit trupor dhe shëndetit të civilëve të mbajtur në qendrën e ndalimit të UÇK-së në Likoc.  Arrestimet janë urdhëruar nga një gjykatës i procedurës paraprake i Gjykatës Themelore të Mitrovicës. Rasti është duke u hetuar nga një prokuror special i EULEX-it i Prokurorisë Speciale të Kosovës.

Ndërkohë bëhet e ditur se në mesin e të dyshuarave është, ish komandanti i SHP të UÇK-së, Sylejman Selimi, aktualisht ambasador i Kosovës në Tiranë, ndërsa janë ndaluar në arrest, ish-komandanti i Zonës Operative të Drenicës, dhe kryetari i Skënderajt, Sami Lushtaku, pastaj eprorët e lartë të UÇK-TMK-së Jahir Demaku, Zeqir Demaku, Hysni Thaçi dhe Sahit Jashari. Veçojmë me këtë rast se  familja e ish-eprorit të UÇK-së, Sahit Jashari i ka dhënë 12 dëshmorë lirisë së Kosovës, më 5.6 dhe 7 mars të vitit 1998, kur regjimi kriminal i Miloshviqit kishte vrarë 56 pjesëtarë të lagjes Jashari, të Prekazit dhe kur në mesin e tyre kishte rënë duke luftuar edhe kryekomandanti i UÇK-së, Adem Jashari.  

Pas arrestimit të sotëm nga ana e EULEX-it, të  disa krerëve të luftës së UÇK-së në Drenicë, organizatat e dala nga lufta çlirimtare kanë drejtuar kritika të shumta në adresë të këtij misioni.

Organizata e Veteranëve të Luftës së Ushtrisë Çlirimtare të Kosovës kanë thënë se lajmi për arrestimin e bashkëluftëtarëve të orëve të para të luftës çlirimtare, është jashtëzakonisht shqetësues për të gjithë liridashës e Kosovës dhe institucionet tona duhet ta shqyrtojnë pozicionin e EULEX-it në Kosovë.  Ne e kemi kundërshtuar vendosjen e misionit të EULEX-it që nga fillimi, e kohë pas kohe kemi kërkuar heqjen e kompetencave ekzekutive të këtij misioni, si dhe kemi reaguar për moskryerjen e detyrave të tij si mision. Mirëpo, kërkesat tona hasën në vesh të shurdhër.

Ne edhe njëherë kërkojmë nga institucionet e Kosovës që të shqyrtojnë seriozisht pozicionin e EULEX-it në vend. Persekutimi i vazhdueshëm i luftëtarëve të lirisë nga EULEX-i, argumenton se këta kanë vetëm një detyrë në Kosovë: njollosjen e luftës çlirimtare të kombit shqiptar në krye me Ushtrinë Çlirimtare të Kosovës. “Tentimi i vazhdueshëm i tyre për të goditur bartësit e luftës çlirimtare, nxjerr përfituese Serbinë dhe bashkëpunëtorët e saj të shumtë në Kosovë. Për këtë arsye, ne kemi argumente të besojmë që strukturat e Serbisë në Kosovë: disa nga portalet dhe gazetat  që botohen në gjuhën shqipe, segmente e grupe të caktuara aktive në politikë si dhe individë të tjerë që fshihen në petkun e intelektualizmit; janë mobilizuar në luftën e ashpër kundër Ushtrisë Çlirimtare të Kosovës, kundër gjakut të mijëra dëshmorëve dhe kundër të gjithë luftëtarëve: nga komandanti e deri te ushtari i zakonshëm. Në këtë përpjekje të tyre të pandalshme, kanë përkrahjen e plotë të EULEX-it, si dhe elementeve të tjerë proserb të diplomacisë evropiane të instaluar në Kosovë, thuhet në mes tjerash në komunikatën e Organizatës së Veteranëve të Luftës së Ushtrisë Çlirimtare të Kosovës.

Gjatë seancës së sotme të Kuvendit, pjesëmarrësit kanë diskutuar edhe për marrëveshjen e nënshkruar në mes të Serbisë dhe kompanisë nga Shtetet e Bashkuara të Amerikës për privatizimin e kompleksit “Trepça”. Gjatë fjalës së tij para deputetëve, kryetari i Kuvendit, Jakup Krasniqi, theksoi se duhet të ndalet procesi i faljes së pasurisë kombëtare të Kosovës përndryshe ata që janë prapa këtij procesi do ta kenë përgjegjësinë për të tashmen dhe të ardhmen e vendit. Ai ka theksuar më tutje se nuk mund të ketë privatizim të Trepçës pa vendim të Kuvendit të Kosovës dhe ka shtuar se çdo formë tjetër e privatizimit do të jetë vazhdim i kriminalizimit të jetës politike në Kosovë. Kryetari i Kuvendit, Jakup Krasniqi ka përkujtuar se “Kompleksi  Trepça” nuk është unik, pasi ka dy drejtorë dhe kjo është çështja e parë që duhet të zgjidhet, Trepça duhet të bëhet një. Kritika dhe vërejtje për marrëveshjen e nënshkruar për shitjen e Trepçës kanë bërë edhe deputetë të partive opozitare.

Autoritetet e larta shtetërore të Shqipërisë nuk kanë ftuar përfaqësues të Kosovës për të marrë pjesë në konferencën dyditore të mbajtur në Tiranë. Në konferencën e shtatë të Iniciativës së shefave të Shtabit të Përgjithshëm të vendeve të Ballkanit kanë marrë pjesë të gjitha vendet e Ballkanit me përjashtim të Kosovës. Në konferencë u diskutua për çështjet e luftës kundër terrorizmit si dhe mbrojtjes kibernetike. Në këtë konferencë kanë marrë pjesë kryetari i Shqipërisë, Bujar Nishani, ministri i Mbrojtes, Arben Imami dhe shefat e Shtabit të Përgjithshëm të Sllovenisë, Kroacisë, Bosnjë e Hercegovinës, Malit të Zi, Serbisë, Greqisë, Bullgarisë, ish Republikës Jugosllave të Maqedonisë, përfaqësues të lartë ushtarak të NATO-s dhe Bashkimit Evropian. Nuk është hera e parë që Shqipëria e Nishanit dhe Berishës, për hir të Serbisë anashkalon Kosovën.

Zyrtarë të lartë të Qeverisë së Kosovës, në përpjekje për të mësuar nga praktika e shteteve tjera dhe me dëshirë për t’ u treguar  se i dalin zot punës, shpeshherë kanë rënë në situata qesharake, duke shkaktuar madje edhe skandale, si ky i  shënimit të “Holokaustit” në Prishtinë, edhe pse dihet botërisht se asnjë hebre nuk ka pësuar nga forcat Nazi-fashiste,  në asnjë vend të Shqipërisë etnike. Andaj Pllaka e Holokaustit në Prishtinë, do të ishte e njëjtë me një pllakë të Holokaustit në ndonjë qytet të Izraelit. Si mund të vendoset një pllakë në shenjë të nderimit të viktimave hebraike, në një vend ku nuk ka pësuar asnjë hebre, ku pjesëtarët e këtij komuniteti i kanë strehuar dhe i kanë ruajtur shqiptarët më shumë se vetveten, madje edhe me faktin se jo pak shqiptarë të Kosovës kanë edhe origjinë hebraike.

Në njoftimin e Ministrisë së Jashtme të Kosovës thuhet se “Gjatë Javës së Tolerancës”,   Prishtina do të marrë  Gurin e  Paqes, duke iu bashkuar kështu grupit të qyteteve që  në të kaluarën kanë nderuar viktimat e luftës, me hapësirën kushtuar atyre. Ky gjest simbolik është përcjellë nga njerëzit e Hiroshimës së Japonisë në tërë globin.  Sipas njoftimit të kësaj ministrie Guri i Paqes do të vendoset në Muzeun Kombëtar  të Kosovës  me pjesëmarrjen e kryetares, Atifete Jahjaga,  zëvendësministrit të Kulturës, Hajdin Abazi, dhe kryetarit të  Prishtinës, Isa Mustafa. Njoftohet gjithashtu se Kryeministri, Thaçi do të inaugurojë  Monumentin e Holokaustit,   në vendin ku ndodhej dikur  sinagoga hebraike në Prishtinë. Në fund të  javës, takimi i dhjetë jubilar i Grupit të Mëngjesit të Lutjeve të Evropës Juglindore (Lutja Kombëtare e Mëngjesit) do të organizohet në Prishtinë nga Kuvendi i Kosovës, nga 24-26 Maj, në të cilin gjithashtu do të marrin pjesë: Atifete Jahjaga, Hashim Thaçi dhe Isa Mustafa. Konferenca ndërfetare e cila do të zhvillohet në Pejë, nga 24-26 maj, -- si pjesë e Javës së Tolerancës --do të jetë gjithashtu një forum i rëndësishëm për debat dhe dialog kritik për çështjet ndërfetare në Kosovë. Ministri i Jashtëm  Hoxhaj, së bashku me organizatat ekumenike nga Kosova dhe Britania e Madhe, do të presin mysafirët, duke përfshirë edhe udhëheqësit e komuniteteve fetare dhe ekspertë nga 42 shtete, të cilët pritet të bisedojnë mbi çështjet e dialogut ndërfetar në Evropë dhe në botë.

Të gjitha këto manifestime janë paraparë të bëhen ashtu sikur bëhen rëndom në shtetet ku hebrenjtë kanë pësuar në mënyrën më barbare, që njeh historia njerëzore. Është shumë e habitshme si ka ndodhur ky “non sens” i llojit të veçantë, kur një ministri, sikur është Ministria e Jashtme e Kosovës, nuk disponon madje as të dhënat elementare lidhur me “Holokaustin” dhe shtetet ku kanë pësuar fatalisht hebrenjtë. Shqipëria, Kosova dhe të gjitha viset etnike shqiptare në Ballkan, kanë qenë i vetmi vendstrehim i sigurt për hebrenjtë gjatë Luftës së Dytë Botërore, ku pjesëtarët e këtij etniteti u ruajtën dhe nuk iu dorëzuan  fashistëve barbarë, gjermanë,  edhe pse në Shqipëri ishte e postuar  një Qeveri kuislinge që bashkëpunonte me fashistët, ndiqte dhe persekutonte partizanët shqiptarë, por ajo nuk arriti t’i arrestojë hebrenjtë, të cilët shqiptarët i ruajtën më shumë se veten. Ky fenomen i ruajtjes së mikut në besë, i përhapur në botën shpirtërore shqiptare, tregon integritetin e jashtëzakonshëm  moral të shqiptarëve tradicionalë, të cilët mikun në shtëpi dhe atë që i kërkonte besën, e konsideronin si anëtar të familjes. Kështu ndodhi edhe me hebraikët, të cilët gjatë tërë historisë së tyre, në Ballkan,  vetëm në trevat shqiptare ishin pritur dhe ishin trajtuar si miq të vërtetë. Asnjë hebre nuk është ndjekur as është persekutuar në trojet shqiptare,  vetëm sepse i ka takuar këtij etniteti.

Shqiptarët, gjatë tërë historisë së tyre, në asnjë periudhë të saj,  nuk e kanë shprehur  antisemitizmin, nuk e kanë zbatuar kurrë atë,  sikur e ka zbatuar Serbia, Greqia, të gjitha shtetet e tjera të Ballkanit dhe të Evropës. Andaj ideja për një pllakë të Holokaustit në Kosovë, është ide donkishoteske, ide e marrë, e cila nuk mund të arsyetohet në asnjë mënyrë dhe me asnjë fakt historik.

Kundër kësaj ideje me të drejtë ka reaguar edhe Shoqata e miqësisë Kosovë-Izrael “Dr. Haim Abravanel”, e cila mision dhe qëllim kryesor ka të zbulojë dhe publikojë faktet për familjet që kanë shpëtuar hebrenj në Kosovë, gjatë Holokaustit, e konsideron të papranueshme vendosjen e pllakës përkujtimore,  në Prishtinë. “Duke e theksuar se përkulemi me nderim para çdo viktime të Holokaustit, gjithashtu dëshirojmë të theksojmë se rrethanat dhe historia e Kosovës, gjatë Luftës së Dytë Botërore, kanë qenë ndryshe nga siç është shkruar deri më sot. Kosova dhe Shqipëria janë raste të veçanta  në Evropë në shpëtimin e hebrenjve gjatë Holokaustit, përfshirë ata që ishin në Shqipëri para Holokaustit, por edhe ata që kanë ardhur aty për t’u strehuar nga vende të ndryshme të Evropës. Gjithashtu, duhet bërë e ditur se ishin pikërisht shqiptarët etnikë të Kosovës ata që ndihmuan hebrenjtë e përndjekur nga vende të ndryshme të Ballkanit dhe Evropës, të kalojnë të sigurt në territorin shqiptar. Pas çlirimit të Kosovës dhe hapjes së arkivave të shtetit shqiptar, në vitet 1990 dhe 1991, kanë dalë në dritë fakte të shumta që vërtetojnë se 100 për qind e hebrenjve në Shqipëri janë shpëtuar”, thuhet në një reagim të shoqatës. Sipas reagimit, përmbajtja e tekstit të kësaj pllake, është një çështje që na shqetëson, “ngase lë mundësinë që historia të interpretohet sikur të ishin pikërisht shqiptarët e Kosovës ata që dorëzuan hebrenjtë në kampet naziste, gjatë Holokaustit”. “Kërkojmë nga institucionet shtetërore të Republikës së Kosovës që sa më parë ta njohin zyrtarisht rolin unik të familjeve shqiptare në Kosovë në shpëtimin e hebrenjve, gjatë Holokaustit, thuhet mes tjerash në reagimin e Shoqatës së miqësisë, Kosovë-Izrael.

Edhe Liga Qytetare Shqiptaro-Amerikane ka reaguar kundër vendosjes së pllakës së “Holokaustit”, në Prishtinë

Në reagimin e Shoqatës thuhet se Shqiptarët e Shqipërisë, Kosovës, Malit të Zi, Kosovës Lindore  dhe Çamërisë janë myslimanë, katolikë, të krishterë ortodoksë dhe hebrenj,  që kanë jetuar pranë njëri-tjetrit në harmoni me shekuj të tërë. Prandaj, Liga Qytetare Shqiptaro-Amerikane mbështet çdo iniciativë që sjell në vëmendjen ndërkombëtare historinë e gjatë të tolerancës ndërfetare te shqiptarët, thuhet në një kumtesë të Ligës Qytetare Shqiptaro-Amerikane, përkitazi me “Javën e tolerancës në Kosovë” “Megjithatë, ne nuk e pranojmë zbulimin e pllakës përkujtimore gjatë ‘Javës së Tolerancës’ në Prishtinë e cila përkujton ‘Hebrenjtë e Kosovës që u zhdukën në kampet naziste të ekzekutimit gjatë Holokaustit’ sepse kjo e shtrembëron të vërtetën mbi atë që ndodhi gjatë. Historia shqiptare është e veçantë: çdo hebre që jetonte në Shqipëri apo që kërkoi strehim aty gjatë Holokaustit u shpëtua. Përderisa gjashtë milionë hebrenj u shfarosën, mijëra hebrenj u shpëtuan për shkak të besës - kodi i nderit që i kërkon çdo shqiptari të mbrojë jetën e çdokujt që kërkon strehim - pa marrë parasysh fenë, ngjyrën, etninë, apo gjininë, edhe nëse kjo nënkupton sakrifikimin e jetës. Shqipëria ishte vendi i vetëm në Evropë që pati më shumë hebrenj pas luftës, sesa para saj. Shpëtimi i hebrenjve nuk mund të ketë ndodhur pa ndihmën e shqiptarëve që jetonin jashtë shtetit sovran të Shqipërisë në Kosovën e pushtuar nga nazistët dhe serbët. Kjo është pllaka që është dashur të jetë ngritur në Prishtinë me 23 maj.

Teksti i pllakës fillon me deklaratën se ‘Ky është vendi ku ka qëndruar sinagoga e fundit e Kosovës deri më 1963’. Kjo gjithashtu fsheh faktet historike. Kosova u sundua nga fundi i Luftës së Dytë Botërore deri më 1966 nga Aleksander Rankoviq, një zyrtar komunist serb që shtypi shumicën shqiptare të Kosovës dhe i cili shkatërroi arkitekturën historike shqiptare, duke përfshirë edhe sinagogën. Po ashtu meqë  Izraeli ende nuk e ka njohur pavarësinë e Kosovës, është e parakohshme të thuhet ashtu sikur thotë programi zyrtar për ngjarjen se ‘Pllaka është gjithashtu shenjë e mirënjohjes për miqësinë e përjetshme mes popullit të Kosovës dhe atij të Izraelit’. Është pikërisht Izraeli që duhet të artikulojë mirënjohjen e tij për rolin e veçantë që shqiptarët luajtën në shpëtimin e hebrenjve gjatë Holokaustit, dhe pastaj t’i bashkohet Shteteve të Bashkuara dhe popujve të tjerë demokratikë që e kanë njohur Kosovën si shtet sovran”, thuhet në kumtesë.