Veriu i vendit rrezikon të mbetet  në vitet e ardhshme në duart e strukturave paralele serbe edhe nëse zbatohet tërësisht marrëveshja e arritur midis Kosovës dhe Serbisë. Deputetët e partive opozitare shprehen skeptikë nëse kjo marrëveshje do të shpërbëjë njësinë e ashtuquajtur ‘Mbrojtja Civile’, e cila besohet të ketë brenda rrathëve të saj rreth 600 pjesëtarë. Madje në pikën tetë të marrëveshjes parashihet që “Anëtarëve të strukturave serbe të sigurimit do t’iu ofrohet nga një vend në strukturat ekuivalente kosovare”. Kurse, kryetari i Komisionit Parlamentar për Punë të Brendshme, Siguri dhe Mbikqyrje të FSK-së, Ahmet Isufi ka thënë për gazetën ‘Zëri’ se nëse pjesëtarët e Mbrojtje Civile kyçen në radhët e Policisë së Kosovës, atëherë veriu do të jetë në tensione të përhershme.

Zëvendëskryeministri, Hajredin Kuçi ka shprehur gatishmërinë e Kosovës për arritjen e një plani për zbatimin e marrëveshjes. Ai ka shfaqur shpresën se një vullnet të tillë do ta tregojë edhe pala serbe. Numri dy i Qeverisë mendon se arritja e planit të zbatimit mund të arrihet vetëm nga njerëzit që janë në instancat më të larta të shtetit, siç është kryeministri i Kosovës, Hashim Thaçi dhe ai i Serbisë, Ivica Daçiq. Kuçi ka theksuar se marrëveshjet ndërkombëtare gjithnjë zbatohen. Megjithatë ai nuk ka përjashtuar mundësinë se mund të ketë zvarritje në këtë drejtim.

Me rastin e arritjes së një plani zbatues për marrëveshjen e Brukselit, pritet të qartësohet edhe çështja e formimit të komunës së Mitrovicës veriore - e cila do të bëhet komuna e katërt me shumicë serbe në veri. Në të vërtetë, krijimi i kësaj komune ishte paraparë edhe me Planin e Ahtuisaarit, që nënkupton se institucionet e Kosovës qysh moti kanë pranuar një plan të tillë. Megjithatë kjo çështje, si shumë të tjera, pritet të adresohet në vazhdën e bisedimeve me Serbinë në Bruksel. Burime të së përditshmes ‘Tribuna’ tërheqin vërejtjen se krijimi i komunës së Mitrovicës veriore pritet të pësojë disa ndryshime, krahasuar me Pakon e Ahtisaarit.

Shtetet perëndimore, përfshirë Gjermaninë dhe SHBA-të, duket se kanë lëshuar pe ndaj kërkesave për zhbërjen e menjëhershme të strukturave ilegale serbe në veri të Kosovës. Gjatë vizitës dyditore të  ministrit të Jashtëm gjerman, Guido Westervele në Beograd do të diskutohet për çështjen e shtetësisë dhe dokumenteve personale për serbët e Kosovës. Gazeta beogradase ‘Novosti’ bën me dije se Beogradi po kërkon që serbëve në Kosovë t’u jepet shtetësia e Serbisë dhe me dokumentet e saj të dalin në votime lokale, që pritet të mbahet në vjeshtë. Kjo gazetë mëson se Westervelle do t’i premtojë Beogradit se do të ushtrojë trysni shtesë ndaj Prishtinës për të hequr dorë nga kërkesa që menjëherë të zhbëhen strukturat ilegale serbe në Kosovë. Në këmbim të kësaj Beogradi do të tregonte vullnet të mirë që në afatin më të shkurtë të mundshëm të zbatonte pjesët e marrëveshjes që kanë të bëjnë me policinë dhe shtetësinë. ‘Novosti’ më tej qartëson se për këtë ‘zgjidhje të mesme’ është pajtuar edhe Uashingtoni, që nënkupton se strukturat ilegale serbe do të vazhdojnë të funksionojnë deri në vjeshtë.

Një konsorcium amerikan do të hyjë në veri të Kosovës për investime. Kompania amerikane ‘New Generation Power’ nga shteti Ilinois ka nënshkruar një kontratë me Ministrinë për Miniera dhe Resurse Natyrore të Serbisë për bashkëpunim biznesor dhe teknik me kombinatin Trepça në veri të Mitrovicës. Ministri serb i Minerave, Milan Baçeviq citohet të ketë thënë se nënshkrimi i kësaj kontrate vjen pas arritjes së marrëveshjes midis kryeministrave Thaçi-Daçiq. Drejtuesi i këtij konsorciumi, Chirinjeev Kathuria ka thënë se për nënshkrimin e kësaj kontrate është dashur që të bashkëpunojë ngushtë me Departamentin Amerikan të Shtetit me qëllim të zgjidhjes së problemeve ligjore që kanë të bëjnë me Trepçën. Madje ai ka deklaruar se së shpejti do të nisë edhe bisedat me Qeverinë në Kosovë.