Pas më shumë se 12 orë të zgjatjes së seancës, Gjykata Themelore në Prishtinë ka caktuar  masën e arrestit shtëpiak për 7-ish-eprorët e Ushtrisë Çlirimtare të Kosovës të  dyshuar për gjoja krime lufte. Avokati i ish-komandantit të Shtabit të Përgjithshëm të UÇK-së, Sylejman Selimi,  Tomë Gashi ka ushtuar ankesë kundër kësaj mase, duke e vlerësuar vendimin e Gjykatës si të pabazë. Prokurori italian Salustro ka kërkuar mbajtjen në arrest  të të dyshuarve, por Gjykata u ka dhënë mundësinë të dyshuarve të mbrohen në liri, masë kjo e cila zakonisht ndërmerret  me qëllim për ta ruajtur situatën e sigurisë. Vendimi i tillë vendimi është mirëpritur nga masa e mbledhur tek Gjykata. Gjatë daljes nga Gjykata prokurori italian Salustro është fishkëlluar nga të pranishmit.

Kryeministri i Kosovës, Hashim Thaçi beson në pafajësinë e komandantëve dhe luftëtarëve të UÇK-së dhe konsideron se  dyshimet për ta janë të paargumentuara dhe të pabazuara.  Kështu u shpreh ai në mbledhjen e Qeverisë, në kohën kur në Gjykatën Themelore filloi marrja në pyetje  e ambasadorit të Kosovës në Tiranë, ish-komandantit të UÇK-së Sylejman Selimi, kryetarit të Skenderajt, Sami Lushtaku, Sahit Jasharit, Zeqir dhe Jahir Demakut. Në mbledhje të Qeverisë u tha se strukturat mike ndërkombëtare po i bëjnë këto veprime pa sens politikë dhe duhet të din se nëse nesër Kosova do të trazohet është faji i atyre. Ata mbase mund të kenë  qëllimin më të  mirë po bëjnë shumë keq. Thaçi ripërsëriti se lufta e UÇK-së ishte e drejtë, luftë e cila bëri që Kosova të fitojë lirinë, pavarësinë, shtetin demokratike dhe partneritetin e ngushtë me bashkësinë ndërkombëtare, SHBA-të, BE-në dhe NATO-në. Edhe ministri i Arsimit Ramë Buja tha se kjo fushatë e arrestimeve mund ta trazojë Kosovën, sepse po arrestohen ata që kanë dhënë shumë për të mirën e vendit, madje edhe të tërë rajonit.

Një delegacion i FSK-së, i kryesuar nga ministri Agim Çeku, sot ka zhvilluar një sërë takimesh zyrtare në selinë e NATO-së dhe BE-së. Fillimisht, ata u pritën nga zëvendës-sekretari i përgjithshëm i NATO-s, Aleksandër Vershbow. Gjatë këtij takimi, ministri Çeku e njoftoi bashkëbiseduesin mbi të arriturat dhe zhvillimin e FSK-së. Me këtë rast, ai kërkoi që FSK t’i shpallë kapacitetet e plota operacionale në një afat sa më të shkurtër. Ndërkaq, ambasadori Vershbow duke vlerësuar lart të arriturat e FSK-së, tha se shpallja e kapaciteteve të plota operacionale do të ndodh së shpejti. Ai konfirmoi se NATO do të vazhdojë ta mbështesë zhvillimin e FSK-së. Gjatë ditës, ministri Çeku ka zhvilluar takime edhe me Maciej Popowski, zëvendës i Baroneshës Ashton dhe me Catherine Venedtt, udhëheqëse e zyrës për Kosovën, në Komisionin Evropian, Drejtoria për Zgjerim.

Në reagimin e banorëve të Açarevës së Drenicës  me rastin e thirrjes në Gjykatën e Apelit të ish-komandantit të UÇK-së, Sylejman Selimi thuhet: Deri tash kemi vëzhguar, kemi parë fuqinë, lëvizjet e EULEX-it, akuzat e tij dhe goditjen e kohëpaskohshme të vlerave të Ushtrisë Çlirimtare të Kosovës. Kemi reaguar në disa raste, por kemi heshtur më shumë, se kemi dashur t’i jepet mundësia EULEX-it të gjurmojë, aty ku dyshon për moralin e ulët të kësaj ushtrie në luftë. Dhe ka goditur shpeshherë, ka ngrehur aktakuza për disa krerë të luftës, por kurrë as nuk ka qenë e as nuk do të jetë në gjendje ta njollosë për asnjë gjë luftën e UÇK-së, absolutisht as tash të akuzuarve të fundit, ashtu siç nuk po është në gjendje ta vlerësojë si duhet atë luftë dhe ta shpallë të drejtë. ...

Si çdoherë tjetër, edhe me këto ndalje, thirrje e marrje në pyetje nga prokuroria e EULEX-it, ne, banorët e fshatit Açarevë, jemi të indinjuar me marrjen në pyetje të, dikur nxënësit tonë të sjellshëm, bashkëluftëtarit tonë, njëherësh komandantit të nderuar, gjenerallejtënant Sylejman Selimi, tash ambasador i Kosovës në Shqipëri, i cili, sa jemi informuar nga mediet, u dyshuaka për krime lufte! Për gjithë ata që s’e dinë, komandant Selimi gjatë gjithë kohës së luftës, po ashtu edhe sot, ka pasur respekt në të gjitha zonat e luftës në Kosovë, se ka qenë një komandant të cilit në fshatin tonë i janë bashkëngjitur, menjëherë me bërjen publike të UÇK-së, mbi 99 për qind të familjeve, se është ai që ka ndërtuar atëkohë ambulantë, që ka bërë furnizim me ushqime për familjet e zhvendosura nga zonat e luftës, që ka nxjerrë e shpëtuar nga zonat e luftës familje të rrethuara nga forcat paramilitare serbe dhe që e ka bërë më të sigurt se zonat e tjera Aqarevën për popullatën e shpërngulur. Është po ky komandant i yni për të cilin nga askush dhe në asnjë vend nuk mund të thuhet e as të përmendet kurrfarë gjesti i ulët, për arsye se ka qenë i përgatitur si komandant, se e ka njohur artin e luftës dhe gjyqin e luftës. Me një fjalë, Syla nuk ka kurrfarë njolle dhe as nuk mund ta drejtojë kush gishtin nga ai.

Përpos thirrjes në pyetje të tij, i kemi përcjellë me vëmendje e i kemi pritur me shqetësim të madh arrestimet e bashkëluftëtarëve tanë, Sami Lushtakut, Sahit Jasharit, Jahir Demakut, Zeqir Demakut e Hysni Thaçit, të cilat i konsiderojmë gjykime dhe akuza politike, të nxitura nga struktura serbe, të cilat kanë qëllim, sikur një pjesë e EULEX-it, ta njollosin luftën e pastër të Ushtrisë Çlirimtare të Kosovës.

Nuk është hera e parë, por shpresojmë të jetë e fundit, që EULEX-i vë gjyq mbi krerët e Ushtrisë Çlirimtare të Kosovës, që ngreh akuza të paqena, që njollos luftën e UÇK-së, që i bënë viktima shumë njerëz e kurrë as nuk kërkon falje e as nuk ka të ndalur në gjykimin e tyre, as pas përfundimit e shpalljes së luftës së drejtë dhe të pastër. Por, ky mobilizim tash së voni i EULEX-it, ndaj këtyre krerëve, Selimit, Lushtakut, Jasharit, Demakëve, Thaçit, nuk e forcon aspak atë (EULEX)-in, as nuk e ndërron kursin e ndjekjes së tij, por do ta forcojë edhe më tutje luftën e drejtë dhe të pastër të UÇK-së, natyrisht edhe këta bartës të luftës çlirimtare, për të cilët kemi nderin që i patëm para nesh në kohë lufte, që i kemi edhe sot në kohë paqe. Në këtë kontekst, pasi jemi ne komuniteti i fshatit Aqarevë që reagojmë, duam që komandanti ynë, i cili ishte shembull i mirë për ne i ushtarit të zotë dhe të drejtë, të lirohet menjëherë nga EULEX-i dhe ta vazhdojë detyrën e ambasadorit të Kosovës në Shqipëri.

Po ashtu, edhe pse shumë vonë, EULEX-i duhet tashmë të vetëdijesohet, pas shumë gjaheve në gjithë Kosovën dhe pas kaq kohësh nga përfundimi i luftës, se kur ngreh arrest ndaj këtyre luftëtarëve ngreh akuzë ndaj gjithë ushtarëve të UÇK-së dhe përdhos edhe gjakun e mijëra dëshmorëve dhe të familjeve të tyre, për arsyen se ishte bërë një luftë e drejtë, se kishte pasur udhëheqje të drejtë, se morali në luftë ka qenë i madh, se kishte komandantë të zotë dhe të moralshëm siç e kishim Sylejman Selimin. Megjithatë, nëse edhe më tutje mbahen në ndalim këta bashkëluftëtarë tanët, atëherë EULEX-i duhet të bëjë vend për gjithë ne, aty afër tyre, edhe në këtë kohë kur mezi po e mbajmë situatën dhe po zbusim mërinë e bashkëluftëtarëve tanë për këto padrejtësi që po u bëhen ish-luftëtarëve pa fund! Po për fund, mbesim me shpresë se e gjithë kjo aktakuzë ndaj tyre do të përfundojë sot me një kërkimfalje nga EULEX-i për të akuzuarit dhe për ne të shqetësuarit, pikërisht në atë çast kur ta bëjë lirimin e tyre.

Kryetar i fshatit,

Musli Haxha

Aqarevë, 24. 5. 2013

Edhe Vetëvendosje sot ka reaguar ndaj akuzave që ka ngritur EULEX-i për udhëheqësit e UÇK-së nga ish Zona Operative e Drenicës. Vetëvendosje vë në dukje se EULEX-i nuk mund të ndajë drejtësi përderisa nuk e njeh shtetin e Kosovës. “Akuzat e burgosjet e fundit të ish-pjesëtarëve të UÇK-së nuk janë as të parat e as të fundit. Statusi, misioni, qëndrimi dhe qasja e EULEX-it ndaj vendit, popullit e historisë sonë edhe s’mund të prodhojnë diçka tjetër edhe detyrimisht e politizojnë gjyqësinë dhe drejtësinë”, thuhet në reagimin e Vetëvendosjes. Më tej kritikohet Qeveria e Kosovës, e cila sipas tyre, nuk po e mbron luftën e drejtë të UÇK-së as si koncept politik e as si vizion kombëtar. Vetëvendosje në vijim përkujton faktin se kryeministri i Kosovës po merret vesh me homologun e tij serb për autonominë e serbëve brenda Kosovës, që do të dirigjohet nga Serbia. Me këtë rast, sipas Vetëvendosjes, kriminelët e strukturave paralele serbe do të amnistohen e integrohen në kuadër të institucioneve të Kosovës.