Duke komentuar procesin gjyqësor për rastin e MTPT-së, avokati Bajram Tmava, ka thënë se ka përpjekje që përmes këtij procesi të dëmtohet Fatmir Limaj si personalitet. Ai ka theksuar se prokurori që po merret me këtë rast nuk ka fakte, duke vlerësuar se i gjithë ky proces ka një prapavijë. “Sipas bindjes sime, dikush po tenton që Fatmir Limaj të dëmtohet, por ndoshta nuk po gjen mjete as mënyrë se si të arrihet deri te kjo çështje”, ka thënë Tmava në një intervistë për të përditshmen ‘Epoka e Re’. Ai  ka folur edhe për klientin e tij, Nexhat Krasniqi, për të cilin ka thënë se është i  pastër për akuzat që po i vihen në ngarkim. Sipas tij, Nexhat Krasniqi po akuzohet vetëm për ta përforcuar përgjegjësinë penale ndaj Fatmir Limajt.

Qeveria amerikane në raportin e saj vjetor për lirinë e besimit nëpër vende të ndryshme të botës, ka theksuar se në Kosovë respektohet liria e fesë. Ky raport thekson se Kushtetuta dhe ligjet e Kosovës mbrojnë lirinë e besimit, kurse Qeveria në përgjithësi e respekton dhe zbaton atë. Në raport theksohet se udhëheqësit fetarë në vend shpesh janë ankuar për mungesën e një mekanizmi që do të lejonte regjistrimin e grupeve fetare për të pasur një status ligjor. Raporti në vijim përmend edhe përpjekjet e përfaqësuesve të ambasadës amerikane në Kosovë për të nxitur udhëheqësit politikë dhe fetarë që të kenë dialog ndër-fetar.

Në një intervistë për gazetën austriake ‘Die Presse’, ministri i Jashtëm i Kosovës, Enver Hoxhaj, i ka quajtur të papranueshme deklaratat e Daçiqit për shkëmbime territoresh. “Për ne, ide të tilla janë të papranueshme. Janë ide kundër multi-etnicitetit dhe kundër vlerave evropiane. Ide të tilla mund të sjellin vetëm dhunë, të cilat mund të reflektohen në të gjithë rajonin”, ka nënvizuar Hoxhaj. Ai ka thënë se ide të tilla mund të vënë në pikëpyetje edhe vetë sigurinë e Serbisë, duke aluduar në çështjen e myslimanëve në Sanxhak apo atë të hungarezëve në Vojvodinë. Duke komentuar marrëveshjen e arritur në Bruksel, ministri Hoxhaj ka thënë se përmes saj “Serbia e njeh realitetin e Kosovës së pavarur, e njeh Kushtetutën dhe institucionet tona”.

Komiteti i Helsinkut në një raport ka shprehur shqetësimin për rritjen e gjuhës së urrejtjes në Maqedoni. Ky komitet thekson se krimet gjithnjë e më shpesh po ndodhin si pasojë e urrejtjes etnike dhe asaj fetare në vend. Në raportin e Komitetit të Helsinkut përmenden 35 incidente në Maqedoni, të cilat vlerësohen të kenë motive etnike ose fetare. “Komiteti i Helsinkit ndjek vazhdimisht gjuhën e urrejtjes etnike në Maqedoni, reagon dhe raporton për të. Është konstatuar nga ky komitet se gjuha e urrejtjes dita ditës po shënon rritje në Maqedoni, dhe ka filluar të gjenerojë krime të shkaktuara nga urrejtja, për të cilat kemi qenë dëshmitarë edhe vet ne”, thuhet në raport. Komiteti i Helsinkut kritikon policinë, gjykatat dhe prokurorinë publike, të cilat kanë dështuar në kapjen e personave përgjegjës. Në shumë prej këtyre incidenteve viktima janë të rinjtë shqiptarë, që sulmohen nga turma huliganësh sllavo-maqedonas.

Qeveria e Shteteve të Bashkuara konfirmon se e njeh Kosovën si shtet të pavarur dhe sovran, ndërkohë që ka sqaruar se “derisa ambasada e Amerikës në Prishtinë nuk është marrë me “New Power Generation”, zyrtarë të Departamentit të Shtetit në Uashington, e kanë këshilluar këtë kompani, se Qeveria e Serbisë nuk ka juridiksion mbi kompleksin e minierave të Trepçës”. “Departamenti i Shtetit, po ashtu, inkurajoi kompaninë “New Power Generation”, që të kontaktojë me Qeverinë e Kosovës për të diskutuar lidhur me investimin, që e ka propozuar”.

Në fund të kumtesës për media, nënvizohet  se rruga para kompleksit të minierave të Trepçës është sfiduese dhe pikërisht për këtë  do të vazhdojmë të rekomandojmë, që investuesit potencialë nga Amerika të hulumtojnë tërësisht ndërmarrjen dhe statusin e saj. Mediet në Beograd, kanë njoftuar opinionin se Ministria për Miniera dhe Resurse Natyrore të Serbisë ka nënshkruar një marrëveshje me konsorciumin amerikan “New Power Generation” për bashkëpunimin të biznesit dhe teknik në Kombinatin “Trepça”, në veri të Mitrovicës.

Kryetari  i Kuvendit, Jakup Krasniqi ka thënë se nuk është në dijeni të marrëveshjes së arritur midis Serbisë dhe një kompanie amerikane për shitjen e Trepçës. Ai ka deklaruar se nuk ka informacione më të hollësishme rreth kësaj çështjeje, përveç infirmatave që kanë qarkulluar  në medie. Krasniqi koniosdeon se  duhet t’i kërkohet llogari Qeverisë, pasi ajo  është përgjegjësja kryesore për mbrojtjen e pasurisë së qytetarëve të vendit. Marrëveshjen e Serbisë me kompaninë amerikane, Krasniqi e ka kualifikuar si cenim të rëndë që i është bërë shtetit të Kosovës.