Anëtarët e Komisionit për Mbikëqyrjen e Agjencisë së Kosovës për Inteligjencë, kanë bërë të ditur se asnjë qytetar i veriut të Kosovës, i cili ka qenë pjesë e agjenturave të Serbisë, nuk mund të bëhet pjesë e Agjencisë së Inteligjencies së Kosovës, Ata e konsiderojnë të palogjikshëm transferimin e një pjesëtari prej një shërbimi inteligjent në tjetrin. Zëvendëskryetari i parë i këtij Komisioni, Fadil Demaku ka kundërshtuar në mënyrë kategorike një veprim të tillë. “Përgjigja ime është jo, sepse kjo as nuk mund të jetë pjesë e marrëveshjeve një çështje. Për më tepër, ai ka thënë se në kuadër të institucioneve të Kosovës të gjithë qytetarët kanë të drejt që të konkurrojnë dhe të bëhen pjesë e institucioneve të Kosovës, pavarësisht në cilin segment është fjala. Por, sipas tij, njerëzit që kanë qenë pjesë e një strukture inteligjente në shërbim të një vendi tjetër assesi se nuk mund të jetë pjesë e një institucioni të një vendit tjetër, pasi që siç thotë ai është natyra e punës specifike, ndjeshmëria e punës dhe pastaj s’mund të ketë as atë mandat, e as atë rol në funksion.

Me një ceremoni përkujtimore  të organizuar sot në Burgun e Dubravës, u përkujtua 14-vjetori i masakrës mbi qindra të burgosur shqiptarë të këtij burgu Në  shënimin e këtij përvjetori  kanë marrë pjesë të mbijetuar të masakrës, familjarë të të vrarëve, ish të përndjekur e të burgosur politikë, zyrtarë të latrë të Qeverisë përfaqësues të Shoqatës së të Burgosurve Politikë, deputetë të Kuvendit të Kosovës, kryetarë të komunave të vendit dhe qytetarë liridashës. Të pranishmit në këtë manifestim përkujtimor kanë bërë homazhe dhe kanë vendosur  kurora lulesh tek vendi,  ku para 14 viteve regjimi vrastar serb  bëri masakër mbi të burgosurit shqiptarë që gjendeshin në këtë burg.

Sot  në Vushtrri është përkujtuar maji i vitit 1999, muaji i dhembjes, por edhe i krenarisë kombëtare, muaji i qëndresës e sakrificës, flijimit dhe solidaritetit të madh. 22 Maji është një kaptinë e veçantë e flijimit, kështu u tha në Vushtrri, gjatë Akademisë së mbajtur në nderim të martirëve, të cilët në ditën e sotme para 14 viteve u vranë apo u zhdukën, për t’u gjetur më vonë në varrezat masive të shqiptarëve, në Serbi.  Nënkryetari i komunës së Vushtrrisë, Dibran Përçuku, ka thënë me këtë rast se kjo ditë përkujton kur në këtë qytet forcat paramilitare e militare serbe vranë, plagosën, dhunuan, burgosën e dëbuan popullatën civile.  “Atë ditë u vranë 34 qytetarë në lokacione të ndryshme të komunës, si në Duboc, Beçiq, Studime dhe në qytetin e Vushtrrisë, ndërsa në përpjekje për të ndihmuar popullatën dhe qarë rrethimin, u vra edhe dëshmori i kombit Blerim Zuqaku”, ka theksuar Përçuku duke shtuar se aksioni ushtarako-policor i filluar në mëngjesin e 22 majit në lagjet e poshtme të qytetit, atje ku popullata civile ishte e koncentruar dhe e bashkuar, bënë që ky aksion të jetë më barbari dhe ndër më  kriminalët në vendin tonë.

Nëpërmjet një komunikate për medie, Lëvizja për Bashkim e ka quajtur si lojë hipokrite të Qeverisë zvarritjen e jetësimit të rezolutës së miratuar në Kuvend për zëvendësimin e tri kodeve aktuale telefonike me kodin e Shqipërisë +355. Miratimi i kësaj rezolute ishte pasuar me një takim me përfaqësues të Qeverisë shqiptare, me ç’rast ishte nënshkruar një memorandum për bashkëpunim, ku pos të tjerash parashihte edhe angazhimin për jetësimin e një kodi të përbashkët telefonik midis Kosovës dhe Shqipërisë. Por, lëvizja e drejtuar nga Avni Klinaku ka thënë se ende nuk janë formuar grupet punuese që do të angazhoheshin për zbatimin e kësaj rezolute. “Duke qenë pjesë të procesit, edhe përkundër insistimit tonë të vazhdueshëm për ta shtyrë atë përpara, ka ndodhur një zvarritje e panevojshme nga ana e institucioneve të Kosovës. Në ndërkohë, nga udhëheqësja e delegacionit të Kosovës në bisedimet për çështje teknike, kuptuam se është afër marrëveshja me Serbinë që Kosova të mos pengohet nga kjo e fundit për të pasur kodin e vet telefonik, me kushtin që Serbisë t’i lejohet një operator në Kosovë”, thuhet në komunikatën e LB-së. Kjo lëvizje ka tërhequr vërejtjen se vazhdimi i kësaj situatë me tri kode telefonike i shkakton Kosovës humbje të mëdha ekonomike.

Sekretari i Përgjithshëm i LDK-së, Ismet Beqiri, ka kërkuar nga kryetarja e vendit që ta shpallë datën e zgjedhjeve lokale jo më larg se në fund të muajit shtator të këtij viti. Sipas tij, fundi i shtatorit do të ishte afati optimal për mbajtjen e zgjedhjeve në mënyrë që të shmangen parregullsitë e mundshme. Përndryshe, Beqiri është shprehur mjaft optimist se LDK do t’i fitojë shumicën e komunave të Kosovës. Ai ka refuzuar të japë ndonjë koment se cili do të jetë kandidati i ardhëm i kësaj partie për kryeqytetin. Beqiri ka akuzuar qeverinë se po pengon në realizimin e projekteve të komunës së Prishtinës.

Gjatë takimit të fundit me përfaqësuesit e serbëve të veriut të Kosovës, zëvendëskryeministri serb, Aleksandar Vuçiq, ka paralajmëruar mundësinë e investimeve kapitale nga Serbia në këtë pjesë. Madje gjatë këtij takimi fare pak është diskutuar zbatimi i marrëveshjes së arritur në Bruksel. Vuçiq ka premtuar se Serbia do të ndajë mjete për ndërtimin e një rrjeti rajonal të ujësjellësit, objekteve vitale si dhe tri urave në komunën  e Leposaviqit. Në takim është hedhur edhe ideja e krijimit të një ndërmarrje të madhe publike, e cila do të mbikëqyrte të gjitha projektet që zbatohen në veri të Kosovës.