Në seancën e fundit të gjykimit të montuar kundër ish-ministrit të MTPT-së, Fatmir Limaj  dhe disa të akuzuarve të tjerë, avokatët e të pandehurve kanë kërkuar nga trupi gjykues që të hedhë poshtë aktakuzën e ngritur nga Prokurori i EULEX-it, me arsyetimin se ajo është e pabazë dhe nuk ka argumente të mjaftueshme.  Gjyqtarja e kësaj lënde të instruktuar, e cila është kthyer në rigjykim nga presioni i prokurorit Salustro, ka vendosur që seanca e radhës të mbahet me 10 qershor, ku rastin për t'iu përgjigjur kundërshtimeve të palës mbrojtëse ndaj aktakuzës do ta ketë prokurori.  Në përmbyllje të paraqitjes së tij, para trupit gjykues, Fatmir Limaj paralajmëroi se për të dëshmuar pafajësinë e tij, do të ftojë si dëshmitarë: kryeministrin, Hashim Thaçi, ish- shefin e Zyrës Civile në Kosovë Piter Feith si dhe ish- kryeprokurorin e EULEX'it, Johannes Van Vriswijk si dhe disa zyrtarë të tjerë të misionit evropian për sundim të ligjit në Kosovë.  Limaj me plot besim ka deklaruar se në aktakuzën për të cilën po akuzohet nuk mund të gjendet asnjë dëshmitar, i cili mund t’i pohoj ato për të cilat prokurori i EULEX'it është duke e akuzuar atë. Prokurori i EULX'it nuk ka gjasë të gjejë asnjë provë.  "S'mund të gjejë asnjë llogari, s’mund të gjejë, në asnjë vend në botë, as për mua, as për vëllezërit dhe familjen time, për ato që po akuzohemi. Edhe katër mijë vjet nuk mund t’i gjejë sepse nuk ekzistojnë”, tha Limaj.

Avokati Kharim Khan ka deklarua se gjykimi i Limajt është duke u bërë si garë në mënyrë që ai të fajësohet në fund, duke e quajtur këtë një metodë politike.  Ky gjykim ndaj nuk është tjetër veç se një metodë politike për ta fajësuar.  Këtu s’ka drejtësi, por garë për të fajësuar atë”, ka saktësuar, avokati  Khan.

Takimi midis delegacioneve të Kosovës dhe Serbisë nuk ka sjellë ndonjë marrëveshje sa i përket çështjes së telekomunikacionit dhe energjetikës. Ndërkaq, shefi i ekipit serb, Dejan Paviçeviq e ka vlerësuar lart takimin e mbajtur të Bruksel, duke theksuar se ka pasur konstruktivitet nga të dyja palët. Sipas tij “është e mundur që të arrihet marrëveshje, por ka ende disa gjëra që duhet të bisedohen”. Paviçeviq ka shtuar se në takim janë kthyer ato pika që konsideroheshin të vdekura. Delegacioni i Kosovës nuk ka raportuar lidhur me takimin e dështuar në Bruksel.

Kuvendi i Kosovës sot ka mbajtur një seancë përkujtimore me rastin e 14-vjetorit të zhdukjes së veprimtarit të madh të çështjes kombëtare, Ukshin Hoti. Me këtë rast, kreu i Kuvendit, Jakup Krasniqi ka vlerësuar se dijetari Hoti i mungoi dikur UÇK-së, por i mungon edhe sot Kosovës. “Mendja e ndritur e Ukshin Hotit i mungonte Luftës çlirimtare të Kosovës, sepse regjimi e mbante në kazamatet e tij për të dytën herë, me shumë vite burgim, për t'ia ndaluar veprimtarinë dhe mbase për t'ia marrë jetën. Por, Ukshin Hoti kishte një ideal, jetonte për një ideal dhe luftonte për një ideal, të cilin nuk mund ta vritnin, as mund ta ndalnin. Ukshin Hoti vazhdon t'i mungojë ndjeshëm dhe tmerrshëm Kosovës, Kosovës së tij që aq shumë e deshi dhe që aq shumë bëri për të”, ka thënë midis të tjerash Krasniqi. Edhe thirrësi i kësaj seance, Idriz Vehapi nga radhët e PDK-së, ka thënë se Ukshin Hoti ishte një nga intelektualët me mendimin më bashkëkohor në Kosovë.

Zëvendëskryeministri, Hajredin Kuçi ka thënë se deklarata e Isa Mustafës për një koalicion të mundshëm me PDK-në është racionale. Në një intervistë dhënë për gazetën ‘Express’, Kuçi ka deklaruar se ‘logjika në Kosovë nuk duhet të jetë përjashtuese, por përafruese’. Ai ka thënë se PDK nuk e ka problem të qeverisë me cilindo subjekt me të cilin e përafron programin e vet. I pyetur se cili do të mund të ishte kontributi i këtij koalicioni për vendin, Kuçi ka thënë se PDK dhe LDK ‘momentalisht janë dy partitë më të mëdha në vend”, prandaj ato e kanë përgjegjësinë më të madhe, por edhe fuqinë për t’i ndryshuar gjërat.

Gazeta e njohur gjermane ‘Frankfurter Allgemeine Zeitung’ në një shkrim kushtuar zhvillimeve në Kosovë e Serbi tërheq vërejtjen se marrëveshja e arritur në Bruksel mund të mbetet vetëm në letër. Sipas kësaj gazete ‘marrëveshja parasheh shpërbërjen e strukturave paralele dhe integrimin e komunave serbe në veri në institucionet e Kosovës’. “Ndonëse marrëveshja është shpallur historike, Berlini zyrtar vazhdon të mbete skeptik sa i përket përmbushjes së kësaj marrëveshje. Gjatë luftërave në Ballkan shumë herë është dëshmuar se marrëveshjet e arritura si kjo kanë mbetur vetëm në letër”, thuhet në komentin e gazetës gjermane. Më tej theksohet se palët e përfshira në proces, veçanërisht Qeveria serbe duhet t’i bindë serbët në veri që ta pranojnë marrëveshjen. Për Bundestagun gjerman -shkruan Frankfurter Allgemeine Zeitung’ - është vendimtare zbatimi i marrëveshjes në terren. Berlini zyrtar kërkon nga palët hartimin e një plani të besusëhm të zbatimit, i cili hap pas hapi do të çonte në normalizimin e marrëdhënieve mes dy vendeve. Në të kundërtën, Bundestagu gjerman nuk do të japë dritën jeshile për integrimin e Serbisë në BE.