Investimet e huaja në Kosovë janë duke shënuar rënie të vazhdueshme. Duke i krahasuar të dhënat e vitit 2012 me vitin 2011 vërehet një rënie investimesh prej 160 milionë eurosh më pak. Të dhënat e Bankës Qendrore të Kosovës bëjnë të ditur se investimet e huaja në Kosovë gjatë vitit 2012 ishin 232 milionë euro, për dallim nga viti paraprak kur ishin 394 milionë euro. Rënia e investimeve të huaja në Kosovë ka filluar nga viti 2009 si pasojë e krizës globale financiare, por edhe prej ndjeshmërisë së investitorëve ndaj zhvillimet e ekonomive të vendeve të euro-zonës. Pjesa më e madhe e investimeve të huaja në vendin tonë janë të përqendruar në sektorët e ekonomisë si patundshmëria, ndërtimtaria, prodhimtaria, sektori financiar, mandej ai i transportit dhe telekomunikacionit. Për dallim prej viteve të kaluara. kur investitorët ishin në pjesën më të madhe nga Britania e Madhe, gjatë vitit 2012 Turqia ka paraqet vendin më numrin më të madh të investimeve në Kosovë.

Deputetit, Fatmir Limaj dhe nëntë bashkëluftëtarëve të tij në rastin ‘Kleçka’ u është vazhduar masa e paraburgimit edhe për dy muaj të tjerë. Lajmin e ka konfirmuar edhe avokati i Limajt, Tomë Gashi. Gjyqtari i EULEX-it, Malcolm Simmons ka sjellë vendim për vazhdimin e masës së arrestit shtëpiak për Limajn dhe nëntë bashkëluftëtarët e tij edhe për dy muaj. Ky vendim është arsyetuar si gjoja pamundësim i ndikimit në dëshmitarin e vet, që sipas avokatit Tomë Gashi është palogjikshmëri juridike. Ai ka thënë se ekipi mbrojtës i Limajt do të vendosë për hapat e mëtejmë juridik, ndërsa gjykimi do të vazhdojë me 3 korrik.

Kryeministri i Kosovës, Hashim Thaçi dhe ai i Serbisë, Ivica Daçiq nesër do të takohen sërish në Bruksel, ku do të diskutojnë në lidhje me përparimin e bërë sa i përket zbatimit të Marrëveshjes së Brukselit. Takimin në fjalë e ka konfirmuar edhe shefja e politikës së jashtme të BE, Catherine Ashton. Ajo ka saktësuar se dy kryeministrat do të flasin për përparimin në zbatimin e Marrëveshjes së 19 prillit, bazuar në planin që të dyja palët kanë miratuar gjatë muajit të kaluar. Duke e mirëpritur shkëmbimin e zyrtarëve ndërlidhës në Prishtinë dhe Beograd, Ashton e ka cilësuar këtë si një hap drejt normalizimit të marrëdhënieve midis dy vendeve.

Në procesin gjyqësor që ka filluar dje ndaj kontrabandistit kryesor serb në veri të Kosovës, Zvonko Veselinoviq, janë zbardhur lidhje të reja midis rrjeteve kriminale që operojnë atje dhe Beogradit. Në fjalën e tij, Veselinoviq ka thënë se barrikadat e vitit 2011 në veri të Kosovës janë planifikuar nga ai në bashkëpunim me ish-kryenegociatorin, Borisllav Stefanoviq dhe krerët e katër komunave serbe në veri. Sipas tij, barrikadat u organizuan në bashkëpunim me pushtetin e asaj kohe në Serbi, kur qeveria drejtohej nga partia e Boris Tadiqit. Veselinoviq së bashkë me dy bashkëpunëtorë të tij në Serbi po gjykohen për çështje përvetësimi kamionash të një kompanie serbe dhe jo për trazirat e dhunshme në veri të Kosovës.

Vendet anëtare të NATO-s janë duke e marrë në konsideratë mundësinë e reduktimit të mëtejshëm të numrit të ushtarëve të KFOR-it në Kosovë. Siç përcjell gazeta Tribuna, në Këshillin Veri-atlantik janë duke u zhvilluar bisedime që gjatë vitit 2014 të zvogëlohet numri i misionit paqeruajtës në jo më shumë se 4 mijë trupa. Kufizimi i KFOR-it do të bëhet në varësi të zbatimit të Marrëveshjes së Brukselit dhe zhvillimeve në veri të vendit. Po të njëjtat burime të gazetës ‘Tribuna’ theksojnë se është duke u diskutuar edhe mbyllja e Bondsteel-it, kampit më të madh të ushtrisë amerikane në rajon.