Në tetor të vitit 1996, shtypit shqiptar iu shtua edhe një organ i ri, Revista „Pavdekësia”, fillimisht organ i Shoqatës së Familjeve të Dëshmorëve të Luftës Antifashiste Nacionalçlirimtare (LANÇ), kurse më pas, i Organizatës Kombëtare për Dëshmorët e Atdheut, me kryetar veteranin e nderuar Nikollaq Sallabanda. 
Pagëzimin me emrin „Pavdekësia” e ka propozuar, veterani dhe publicisti i mirënjohur, Pipi Mitrojorgji. Kurse kryeredaktor i parë i saj, ka qenë gazetari i mirënjohur, Dr. Kozma Skarço. Që të tre këta personalitete, janë ndarë nga jeta. 
Që nga viti 2001, kryeredaktor i saj është gazetari, Halil Katana. 
Misioni i kësaj reviste është përjetësimi i veprës dhe emrit të dëshmorëve të kombit të të gjitha kohërave, si dhe respektimi e nderimi i familjeve të tyre brez pa brezi. Njëkohësisht, duke qenë organi i një subjekti të tillë shoqëror, siç është Organizata Kombëtare për Dëshmorët e Atdheut (OKPDA), ajo pasqyron veprimtaritë e kësaj organizate në të gjithë vendin, si dhe mban qëndrime të vendosura politike ndaj forcave të caktuara, që mohojnë gjakun e dëshmorëve të LANÇ, apo të periudhave të tjera, dëshmorë të shpallur me ligj, sipas Statusit të Dëshmorit të Atdheut (ligji Nr. ..8607, datë 27.04.2000). 

Tirazhi i kësaj reviste botohet nga 1600 deri në 2000 kopje. 

Stafi aktual i revistës përbëhet: 

Halil Katana – Kryeredaktor (halilkatana@yahoo.com) 
Musli Matoshi- gazetar
Jani Capo – gazetar
Agim Shanaj- administrator. 

Revista, me idealet që mbron dhe përcjell, ka afruar rreth vetës disa personalitete të publicistikës, të letërsisë e të kulturës sonë kombëtare, të cilët me shkrimet për dëshmorët e heronjtë dhe me këshillat e tyre të herëpashershme, e kanë ndihmuar këtë revistë në vazhdimësi. Për këtë arsye revista i ka vënë ata në ballë të nderit të saj, duke i shpallur
„Nderi i revistës „Pavdekësia”: 
Dritero Agolli
Xhemil Frashëri
Nasho Jorgaqi
Vasil Gjylameti
Stiliano Sallabanda
Kadri Dingu
Myftar Memia
Ymer Minxhozi. 

Revista është mbajtur gjallë nga bashkëpunëtorët e shumtë në të gjithë Shqipërinë. Duhet theksuar se këta bashkëpunëtorë janë njerëz idealistë, që shkruajnë në revistë dhe nuk marrin asnjë shpërblim. Redaksia ka ftuar të shkruajnë në faqet e revistës shokë të dëshmorëve, bashkëluftëtarë të tyre, dëshmitarë okularë të ngjarjeve madhore të luftës, sepse këta janë historia e gjallë dhe e pakontestueshme e saj. Me një punë këmbëngulëse është arritur t´u merren shkrime disa figurave të LANÇ, në momentet e fundit të jetës së tyre: shkrime me vlera. 

Revista është përqëndruar në tri drejtime kryesore: 
Përkujtimi i heronjëve dhe dëshmorëve, respektimi i familjeve të tyre dhe jeta e gallë e organizatës. Në përkujtimin e heronjëve dhe të dëshmorëve është synuar, në radhë të parë të mos mbetet asnjë prej tyre jashtë vëmendjes dhe, së dyti, të plotësohet sa më mirë portreti, jeta dhe vepra e secilit me fakte dhe argumente të reja. 

Një vend të veçantë në faqet e revistës kanë zënë familjet me shumë dëshmorë. 

Revista ka bërë dhe bën një punë të madhe për respektimin e familjeve të dëshmorëve. 
Kjo është ndarë në tri periudha: 
Periudha e parë ´96 – 2000 janë përpjekjet e mëdha për hartimin dhe miratimin e Statusit të Dëshmorit dhe familjes së tij, gjatë së cilës janë botuar artikuj e shkrime të ndryshme mbi domosdoshmërinë e hartimit të këtij statusi, duke paraqitur edhe projekte konkrete. 
Përiudha e dytë nga 2000 deri në 2002, janë përpjekjet për ta detyruar qeverinë që të hartonte aktet nënligjore dhe masat për vënien në zbatim të këtij Statusi. 
Përiudha e tretë, është kjo që jetojmë, përpjekjet për mbrojtjen e Statusit. Janë botuar deklarata, promemorje dhe shkrime të ndryshme, që argumentojnë qellimet e mbrapshta politike për heqjen e shpërblimit të familjeve të dëshmorëve. 
Revista ka pasqyruar veprimtaritë e organizatës, në qendër e në rrethe, duke synuar jo vetëm një propagandë të thjeshtë, por dhe përvojën e mirë. Për këtë redaksia është ndalur më shumë te puna e aktivistëve që punojnë me një përkushtim të admirueshëm. 
Ndërkohë janë bërë shumë përpjekje, për të sjellur në faqet e revistës brezin e ri, nxënës e studentë, duke hapur për krijimet e tyre faqe të veçanta letrare. 
„Pavdekësia”, me shkrimet e saj, përkrah gazetës “Kushtrim Brezash”, ka plotësuar një zbrazëti të ndjeshme, të krijuar në shtypin shqiptar gjatë këtyre 17 vjetëve të fundit, duke mbajtur të pashuar emrin dhe veprën e dëshmorëve të LANÇ dhe të dëshmorëve të të gjitha kohërave, në hapësirat mbarëkombëtare. 

I dashur lexues, 
Ju lutem dërgoni në adresën e E- mail: halilkatana@yahoo.com, shkrime për botim, mendime e sugjerime... 
Ju mirëpresim!

Shfleto revistën:
REVISTA “PAVDEKËSIA nr.52”
REVISTA “PAVDEKËSIA nr.53”
REVISTA “PAVDEKËSIA nr.54”
REVISTA “PAVDEKËSIA nr.55”
REVISTA “PAVDEKËSIA nr.56”
REVISTA “PAVDEKËSIA nr.57”
REVISTA “PAVDEKËSIA nr.58”
REVISTA “PAVDEKËSIA nr.59”
REVISTA “PAVDEKËSIA nr.60”
REVISTA “PAVDEKËSIA nr.61”
REVISTA “PAVDEKËSIA nr.62”
REVISTA “PAVDEKËSIA nr.63”
REVISTA “PAVDEKËSIA nr.64”
REVISTA “PAVDEKËSIA nr.65”
REVISTA “PAVDEKËSIA nr.66”