Ministri i Jashtëm gjerman, Guido Westerwelle, gjatë qëndrimit në Beograd ka deklaruar se në Bruksel është arritur një marrëveshje mes Kosovës dhe Serbisë, por tani duhet të zbatohet. Dua t’ju inkurajoj që marrjen e vendimeve të vështira ta bëni në mënyrë të drejtë dhe me guxim”, i ka thënë Westerwelle  zëvendës-kryeministrit serb Aleksandër Vuçiq, transmeton Blic.“Dy vendet tona janë evropiane. Edhe ne, edhe ju, jemi pjesë e Evropës dhe partnerë të barabartë. Në pyetjen nëse Gjermania do ta bllokojë Serbinë në marrjen e datës për fillimin e negociatave për anëtarësim në BE, dhe nëse duhet plani për implementimin e asaj që është nënshkruar në Bruksel, Westerwelle ka thënë: “Është me rëndësi që të arrihet marrëveshja për planin e zbatimit dhe implementimin e atij plani, hap pas hapi, jo përnjëherë, dhe që të shihen përparimet në këtë. Ky është kushti kryesor i Serbisë drejtë BE-së”.

Ambasadori i Gjermanisë  në Kosovë, Peter Blomejer, duke komentuar takimet që po zhvillohen në Bruksel mes dy kryeministrave, ka deklaruar se arritja e një plani për zbatimin e marrëveshjes mes Kosovës e Serbisë sigurisht që nuk është aq e thjeshtë, por është shumë më e lehtë sesa ajo çka është arritur deri tash në këtë dialog, ka thënë ambasadori gjerman në Kosovë. Ai shpreson se Thaçi dhe Daçiq në takimin e radhës, që do të mbahet të martën në Bruksel do të arrijnë të pajtohen për një plan, i cili do t’i çonte në zbatimin e marrëveshjes Kosovë-Serbi.  Ndërsa vizitën e shefit të diplomacisë Guido Westervelle, i cili dje qëndroi në Beograd dhe sot në Prishtinë, ambasadori gjerman e quan vizitë në një moment të përshtatshëm, ku pikërisht një ditë pas kësaj vizite Thaçi dhe Daçiq do të takohen në Bruksel. Blomeyer thotë se Westervelle do t’i inkurajojë të dy palët që të tregojnë vullnet më të madh për të çuar përpara procesin për arritjen e një marrëveshjeje. 

Liderët politikë dhe institucionalë të vendit, janë dashuruar me pushtetin, dhe për asnjë çmim nuk pranojnë të ikin nga aty, duke u shndërruar në mbretër, vlerëson Murat Jashari. Kosova nuk ndodhet në situatë të mirë, dhe kjo nuk është pa fajin e lidershipit politik të vendit, të cilët janë dashuruar me pushtetin dhe nuk e kanë ndjesinë e halleve të popullit. Liderët duhet të ndërrohen, pasi që prania e tyre  për një kohë të gjatë në pushtet  i ka shndërruar ata në mbretër. Kosova ka nevojë për liderë të rinj dhe të pastër në ndërgjegje, vlerëson Jashari. Kur flet për evidentimin e veteranëve të luftës së UÇK-së, dhe vrapin e marrjes së meritave të paqena, Jashari thotë se “me disa kategori duhet pasur kujdes, sepse përveç që është e padrejtë, është edhe ofendim për ata që kanë luftuar dhe kanë lënë gjymtyrët e tyre të trupit për lirinë e vendit”. Familja Jashari, thotë ai, do të vazhdojë të kritikojë ata që nuk punojnë si duhet për këtë vend dhe jo t’i duartrokasë dhe se nuk u intereson nëse kjo u pëlqen apo jo liderëve politikë të vendit, ka thënë mes tjerash, Murat Jashari.

Qeveria e Kosovës pritet të kërkojë sqarim nga Ambasada amerikane, në Prishtinë, pas nënshkrimit të marrëveshjes ndërmjet konsorciumit amerikan “New Generation Power”, dhe Ministrisë për Miniera dhe Resurse Natyrore të Serbisë, për bashkëpunimin biznesor dhe teknik në kombinatin “Trepça”, në veri të Mitrovicës. Zëvendës-kryeministrja Mimoza Kusari Lila i ka thënë se lidhur me  këtë ndërhyrje  duhet edhe një konfirmim zyrtar nga Ambasada amerikane në Kosovë. Duket se kjo marrëveshje është diskutuar edhe në Bruksel, sado që tani për tani Qeveria e Kosovës nuk i ka bërë të ditur opinionit lidhur me këtë “Pazar” që është bërë mbi kurriz të resurseve dhe pasurive tokësore të vendit tonë.

AKP-në nuk e ka pyetur askush lidhur me shitblerjen e pronave e pasurive të Kosovës në veri

Agjencia e Kosovës për Privatizim nëpërmjet një komunikate për media, ka bërë të ditur se është vënë në dijeni nga mediet elektronike lidhur me të ashtuquajturën marrëveshje për bashkëpunim afarist dhe teknik ndërmjet Konsorciumit NGP dhe përfaqësuesve të Trepçës, e sponsoruar nga Ministria e Minierave dhe Resurse Natyrore e Republikës së Serbisë. Agjencia, në cilësinë e Administratorit, nuk është informuar për rastin në fjalë, si dhe nga AKP nuk është kërkuar aprovim apo informatë paraprake për një marrëveshje eventuale të tillë. Andaj, marrëveshja eventuale e lartpërmendur, siç theksohet në komunikatë, konsiderohet se është në kundërshtim me dispozitat ligjore të aplikueshme në Republikën e Kosovës, dhe si e tillë cenon autoritetin administrativ të Agjencisë së Privatizimit, është e pavlefshme dhe e pazbatueshme në praktikë. “Në bazë te Ligjit për Agjencinë Kosovare të Privatizimit, Agjencia është e autorizuar për administrimin e të gjitha ndërmarrjeve shoqërore në Kosovë, duke përfshirë autorizimet për shitjen, transferimin si dhe likuidimin e këtyre ndërmarrjeve dhe aseteve të tyre”, thuhet mes tjerash në komunikatë.

Policia e Kosovës ka nisur hetimet për fondin e 3 përqindëshit të Qeverisë në ekzil, që udhëhiqej asokohe nga Bujar Bukoshi. Mediet bëjnë të ditur se kanë filluar të hetohen të gjitha transaksionet e kryera nëpër banka të ndryshme ku ishin deponuar shuma të mëdha parash nga ky fond. Mësohet se kjo çështje është ngritur fillimisht nga të huajt, por tani lënda ka kaluar tek vendorët.  Gjatë këtij hetimi janë duke u intervistuar të gjithë njerëzit që kanë mbajtur poste të rëndësishme në Qeverinë në ekzil. I pyetur në lidhje rastin, Bujar Bukoshi ka thënë se “nuk ka asgjë të keqe nëse hetohet ky fond”. Ai ka thënë se është i gatshëm të bashkëpunojë me organet e drejtësisë nëse i kërkohet një gjë e tillë.