Ministri Kujtim Shala priti Përfaqësuesen e Posaçme të BE-së, Natalia Apostolova

26/10/2016 Institucionet

Ministri i Kulturës, Rinisë dhe Sportit, Kujtim Shala, ka zhvilluar një takim pune me Natalia Apostolova, Përfaqësuese e Posaçme e BE-së, me të cilën ka bashkëbiseduar rreth çështjeve të interesit të përbashkët dhe bashkëpunimit të MKRS-së me këtë zyre, në fushat specifike, që lidhen me kulturën, trashëgiminë kulturore, sportin dhe rininë.

Fillimisht ministri Shala i uroi Apostolovas mirëseardhje në Kosovë dhe u shpreh se MKRS-ja është e hapur që të bashkëpunojë ngushtë me zyrën e BE-së në Kosovë/PPBE në dobi të kulturës, trashëgimisë kulturore, rinisë dhe sportit, dhe shtoi se MKRS-ja këtë zyre e konsideron tejet të rëndësishme për të ardhmen evropiane të Kosovës.

Nga ana tjetër, përfaqësuesja Apostolova e falënderoi ministrin Shala për pritjen dhe u shpreh se bashkëpunimi me MKRS-në do të vazhdojë në fusha specifike që kanë të bëjnë me kulturën, rininë, sportin dhe veçmas me trashëgiminë kulturore të Kosovës.

Po ashtu, me një theks të veçantë, ndërmjet ministrit Shala dhe përfaqësueses së posaçme të BE-së në Kosovë, Apostolova, u bisedua edhe rreth nevojës që të thellohet bashkëpunimi ndërmjet Institucioneve të Kosovës dhe Kishës Ortodokse Serbe në Kosovë, nëpërmjet organizimit të takimeve të përbashkëta dhe bashkëbisedimit si rruga më e mirë për t’i trajtuar të gjitha çështjet e interesit të përbashkët dhe shqetësimet që lidhen me trashëgiminë kulturore të Kosovës.

Më tej, Shala dhe Apostolova u shprehën se bashkëpunimi dhe bashkëbisedimi janë rruga më e mirë për të krijuar një klime të mirëbesimit ndërmjet komuniteteve në Kosovë dhe u zotuan se do të punojnë për një gjë të tillë.

Kontrolloni gjithashtu

Kryetari Latifi nënshkroi kontratat me tre praktikantë nga skema praktike në punë

Sot, kryetari i komunës së Rahovecit z. Smajl Latifi nënshkroi kontratat me tre praktikantë nga …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara