Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një ngjarje me rëndësi të veçantë për Rahovecin dhe për kujtesën historike, u bë përurimi i librit “Proza popullore legjendare shqiptare”, e autorit prof. dr. Sabahajdin Cena, një prej figurave më të spikatura të Ushtrisë Çlirimtare të Kosovës dhe një studiues i rrallë i trashëgimisë shpirtërore shqiptare, i mbështetur nga Komuna e Rahovecit.
Ky libër rrjedh nga disertacioni i doktoratës të profesor Cenës dhe paraqet një kontribut të vyer në studimin dhe përjetësimin e folklorit, legjendave dhe rrëfimeve popullore shqiptare. Përmes këtij botimi, autori ka dëshmuar jo vetëm përkushtimin ndaj kulturës, por edhe lidhjen e pandarë mes luftës për liri dhe trashëgimisë shpirtërore të kombit tone, ka thënë kryetari i komunës së Rahovecit, z. Smajl Latifi.
Për angazhimin dhe punën e palodhur në sjelljen e këtij botimi të çmuar, kryetari Latifi ka falënderuar prof. asoc. dr. Besim Muhadrin, prof. asoc. dr. Flamur Shalën, dhe të birin e profesorit, Samedin Cenën, të cilët me përkushtim profesional dhe dashuri për trashëgiminë kulturore dhanë ndihmesë të çmuar në këtë proces.
Në këtë ceremoni përkujtimi nderuam edhe epopenë e korrikut ‘98, ku Rahoveci dhe rrethina u bënë pjesë e lavdisë kombëtare në luftën për liri.
Përjetësisht do të kujtohen dëshmorët:
Mizahir Isma, Esherefedin Kastrati, Bekim Isma, Arian Brahimi – Shkodrani,
Abdullah Bugari, Agim Kelmendi, Gani Paçarizi – Rreziku, Tafil Zyberaj, Gëzim Hamza – Piktori, Gëzim Mullabazi,
Xhafer Nurkasa, Remzi Ukshini, Bajram Veliu, Faik Rama, Samir Nurkasa, Xhevat Kasapi, Agim Qelaj, Liman Gegaj, Hamdi Berisha, Habib Berisha, Afrim Krasniqi, Sadik Shala, Ramadan Morina dhe Ruzhdi Xhuliqi. Po ashtu, dëshmorët Shkëlzim Zllanoga dhe Shejh Myhedin Shehu, që u flijuan në rrethana të dhimbshme e të padrejta.
Ne do të vazhdojmë ta mbështesim çdo përpjekje që ndriçon historinë dhe ruan vlerat tona kombëtare, sepse kjo është detyra jonë ndaj atyre që dhanë gjithçka për lirinë që gëzojmë sot.
Nder dhe lavdi për profesorin tonë të ndjerë, prof. dr. Sabahajdin Cena!
Lavdi përjetë dëshmorëve të Rahovecit dhe të gjithë dëshmorëve të kombit, ka thënë ndër të tjera në fjalën e tij, kryetari i komunës së Rahovecit, z. Smajl Latifi.
