Të enjtën u zbulua pllaka përkujtimore në nderim të dëshmorëve Mustafë Durguti, Halim Durguti dhe Nuredin Durguti, të cilët u pushkatuan nga forcat e regjimit serbo-jugosllav në Bubavec, më 13 dhjetor 1945.
Me këtë rast u nderua sakrifica dhe kontributi i tyre për lirinë e atdheut, duke ruajtur të gjallë kujtimin dhe veprën e tyre për brezat që vijnë. Lavdi e përjetshme dëshmorëve. Në këtë aktivitet i pranishëm ishte edhe kryetari i komunës së Rahovecit, z. Smajl Latifi, si dhe ish Kryetari i Këshillit të Bashkësisë Islame në Malishevë, Xhevat ef. Kryeziu.
“Mustafë Durguti ishte personalitet i veçantë atdhetar që veproi pareshtur për lirinë dhe bashkimin e trojeve shqiptare deri në frymën e fundit.
Sakrifica e tyre është gurthemeli mbi të cilin u ndërtua rruga jonë drejt lirisë. Emrat dhe vepra e tyre do të mbeten përherë të gdhendur në kujtesën tonë kolektive, si frymëzim për brezat që vijnë.
Është detyrë e secilit prej nesh ta ruajmë dhe ta nderojmë këtë trashëgimi, duke kujtuar me mirënjohje ata që dhanë gjithçka për atdheun dhe lirinë e tij.
Lavdi e përjetshme Mustafë Durgutit, Halim Durgutit dhe Nuredin Durgutit! Qoftë i paharruar kujtimi dhe sakrifica e tyre”, ka shkruar kryetari i Rahovecit, z. Smajl Latifi.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
