leoni

Mbahet dëgjimi buxhetor me qytetarët e Komunës së Deçanit

05/08/2025 Institucionet

Të martën në ambientet e Komunës së Deçanit, u mbajt dëgjimi publik në kuadër të procesit të planifikimit të buxhetit për vitin 2026, ku morën pjesë qytetarë nga zona të ndryshme të komunës.

Takimin e hapi Drejtoresha për Buxhet dhe Financa, znj. Dafina Cacaj, e cila para të pranishmëve prezantoi projektbuxhetin e Komunës për vitin 2026, si dhe parashikimet për vitet 2027 dhe 2028. Ajo shpjegoi në mënyrë të detajuar planifikimin financiar të komunës, destinimin e fondeve dhe prioritetet kryesore që janë paraparë të realizohen.

Në këtë dëgjim mori pjesë edhe Kryetari i Komunës së Deçanit, z. Bashkim Ramosaj, i cili iu drejtua qytetarëve me një fjalë rasti, ku paraqiti projektet që tashmë janë në zbatim, si dhe ato që pritet të fillojnë gjatë periudhës së ardhshme. Kryetari Ramosaj theksoi përkushtimin e institucioneve komunale për zhvillim të qëndrueshëm dhe investime të vazhdueshme në infrastrukturë.

Qytetarët shfrytëzuan këtë takim për të parashtruar pyetje, propozime dhe shqetësime konkrete. Ata iu drejtuan drejtpërdrejt Kryetarit të Komunës, z. Bashkim Ramosaj, dhe Drejtoreshës për Buxhet dhe Financa, znj. Dafina Cacaj, me kërkesa që kishin të bënin me nevojat e përditshme të komunitetit, përmirësimin e infrastrukturës lokale, mbështetjen për sektorin e bujqësisë, ndriçimin publik, kanalizimet dhe çështje të tjera që prekin jetën e përditshme të qytetarëve.

Kryetari Ramosaj dhe drejtoresha Cacaj i dëgjuan me vëmendje të gjitha kërkesat dhe dhanë sqarime për secilën çështje të ngritur, duke theksuar rëndësinë e pjesëmarrjes së qytetarëve në këtë proces. Ata gjithashtu shprehën gatishmërinë për të shqyrtuar me seriozitet të gjitha propozimet, me qëllim të përfshirjes së tyre në planifikimin përfundimtar të buxhetit.

Ky takim dëgjimor është pjesë e një procesi të rregullt që Komuna e Deçanit zhvillon për të siguruar transparencë, llogaridhënie dhe përfshirje të qytetarëve në vendimmarrjet që kanë ndikim të drejtpërdrejtë në jetën e tyre.

Kontrolloni gjithashtu

Fatmir Limaj: Vazhdojmë +4 me Ekrem Kastratin për Malishevën Urbane që na bashkon!

Kryetari i Nismës Socialdemokrate, z. Fatmir Limaj të martën me shumë krenari, njoftoj rikandidimin e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara