Pikërisht në ditën e zgjerimit të BE-së me 27 maj në Bruksel, për herë të parë inaugurohet Grupi për Kosovën në Komitetin Evropian të Rajoneve.
Asociacioni i Komunave të Kosovës (AKK) merr pjesë në cilësinë e vëzhguesit dhe partnerit bashkëpunues në kuadër të aktiviteteve të Komitetit Evropian të Rajoneve.
Duke pasur parasysh rëndësinë e kësaj hapjeje të një forumi formal për të rritur pjesëmarrjen e autoriteteve lokale të Kosovës në procesin e pranimit në BE, në inaugurimin e Grupit për Kosovën po merr pjesë delegacioni nga Asociacioni i Komunave të Kosovës i kryesuar nga Kryetari z.,Agim Aliu me përbërjen z.Xhafer Gashi – Anëtar i Bordit të AKK-së, z.Përparim Rama – Kryetar i Prishtinës dhe z.Sazan Ibrahimi – Drejtor Ekzekutiv i AKK-së.
Inagurimi i Grupit për Kosovën hapet me debatin “Gjendja e Marrëdhënieve BE-Kosovë dhe ndikimi në Autoritetet Lokale” ndërsa në ftesën që ka marrë Asociacioni për këtë inaugurim thuhet “po ju informojmë zyrtarisht se Komiteti Evropian i Rajoneve ka vendosur të formojë një Grup të ri Pune të dedikuar tërësisht për marrëdhëniet me Kosovën (të cilat në të kaluarën janë vepruar nën një Grup Pune më të gjerë për Ballkanin Perëndimor).
Meqenëse rreth 70 % e acquis të BE-së ndikon ose do të zbatohet nga nivelet lokale dhe rajonale të qeverisjes, Komiteti thekson se do të jetë thelbësore të rritet ndërgjegjësimi për këtë fakt që në fillim – dhe t’i përgatitë ata për rolin e tyre kyç përmes dialogut politik dhe shkëmbimit të praktikave më të mira.
Ne e vlerësojmë shumë bashkëpunimin tonë të shkëlqyer me AKK-në në të kaluarën dhe shpresojmë që ju do të mbeteni partneri ynë kryesor në këtë mision të përbashkët për të ardhmen”.
Duke përfaqësuar Komunat e Kosovës në inaugurimin e ‘Grupit për Kosovën’ në kuadër të Komitetit Evropian të Rajoneve, Kryetar i Asociacionit të Komunave të Kosovës z.Agim Aliu në fjalën e vetë theksoi:
“E nderuara Kryetare znj. Coughlan, anëtarë të respektuar të Komitetit të Rajoneve,
Është një kënaqësi dhe nder i madh për mua që të ju drejtohem sot në këtë sesion inauguruese të Grupit të Punës për Kosovën. Më lejoni të filloj duke shprehur mirënjohjen time të thellë ndaj Kryetares dhe Komitetit për ftesën, dhe më e rëndësishmja, për iniciativën për të themeluar këtë Grup Pune në një moment kaq strategjik.
Vendimi për të krijuar një Grup Pune të dedikuar për Kosovën, i ndarë nga korniza më e gjerë e Ballkanit Perëndimor, dërgon një mesazh të fuqishëm. Ai konfirmon rëndësinë e Kosovës në familjen evropiane të rajoneve dhe qyteteve dhe pasqyron pjekurinë dhe potencialin në rritje të institucioneve tona lokale.
Jam këtu sot si Kryetar i Asociacionit të Komunave të Kosovës, një institucion që për më shumë se dy dekada ka punuar pa u lodhur për të përfaqësuar interesat e qeverisjes lokale në Kosovë. AKK i shërben të gjitha 38 komunave tona — urbane dhe rurale, të mëdha dhe të vogla, nga çdo rajon dhe komunitet i vendit tonë. Misioni ynë gjithmonë ka qenë të promovojmë qeverisje lokale të fortë, transparente, gjithëpërfshirëse dhe efektive — jo vetëm si çështje e efikasitetit, por si një gur themeli i demokracisë dhe kohezionit shoqëror.
Kosova ka bërë përparim të jashtëzakonshëm në ndërtimin e demokracisë lokale që nga ditët e saj më të hershme. Përmes procesit të decentralizimit dhe në përputhje me Kartën Evropiane për Vetëqeverisjen Lokale, Komunat kanë marrë gradualisht më shumë përgjegjësi në ofrimin e shërbimeve, zhvillimin lokal dhe llogaridhënien publike. AKK e ka mbështetur këtë proces në çdo hap përmes avokimit, mbështetjes teknike, ngritjes së kapaciteteve dhe dialogut konstruktiv me qeverinë qendrore.
Por gjithashtu e kuptojmë se udhëtimi ynë ende vazhdon. Komunat e Kosovës vazhdojnë të përballen me sfida të mëdha dhe pikërisht për këtë arsye takimi i sotëm dhe krijimi i këtij Grupi Pune është aq jetik.
E shohim këtë platformë të re si një mundësi thelbësore për të forcuar dhe thelluar bashkëpunimin tonë me Bashkimin Evropian, dhe në veçanti me Komitetin Evropian të Rajoneve. E shohim atë si një mekanizëm për:
– Të shkëmbyer përvoja me qeveritë lokale në mbarë Evropën;
– Të përafruar me vlerat, standardet dhe politikat e BE-së në nivel lokal;
– Të kemi qasje në ekspertizë dhe praktika më të mira në fusha si ofrimi i shërbimeve, pjesëmarrja e qytetarëve, digjitalizimi dhe qëndrueshmëria mjedisore;
– Dhe në fund, për të siguruar që rruga evropiane e Kosovës të përfshijë autoritetet tona lokale.
Besoj se qeveritë lokale nuk janë vetëm zbatues të politikave; ato janë formësuese të politikave, nxitëse të inovacionit dhe shtresa më e afërt e qeverisjes me qytetarët. Prandaj, udhëheqja lokale duhet të jetë në zemër të zgjerimit, dhe zëri i komunave duhet të dëgjohet dhe fuqizohet.
Duke parë përpara, do të doja të theksoj tri prioritete kyçe që Asociacioni i Komunave të Kosovës synon t’i ndjekë në bashkëpunim të ngushtë me Grupin e Punës:
1. Thellimi i Bashkëpunimit Strategjik me Komitetin e Rajoneve dhe Komunat e BE-së
Dëshirojmë të institucionalizojmë bashkëpunimin ndërmjet AKK-së dhe Komitetit të Rajoneve përtej dialogut të herëpashershëm. E imagjinojmë përmes aktiviteteve të përbashkëta të rregullta, iniciativave të të mësuarit nga kolegët Kryetar të Komunave, shkëmbimeve tematike dhe partneriteteve me komuna evropiane. Autoritetet lokale të Kosovës kanë shumë për të mësuar nga homologët e tyre të BE-së, por gjithashtu kemi përvoja për të ndarë, veçanërisht në fusha si qeverisja lokale në shoqëri pas-konfliktuale, administrimi multietnik dhe kohezioni social.
2. Mbështetja e Përafrimit me BE-në në Nivel Lokal
Ndërsa Kosova vazhdon rrugën e saj drejt integrimit në BE, përafrimi i politikave dhe praktikave tona lokale me legjislacionin e BE-së është thelbësor. Kjo përfshin punën në mbrojtjen e mjedisit, prokurimin publik, transparencën dhe menaxhimin fiskal. AKK është e gatshme të ndihmojë në nivel kombëtar që komunat tona të përafrohen me standardet dhe rregullat e Bashkimit Evropian, duke ofruar udhëzime, trajnim dhe mbështetje të organizuar.
3. Promovimi i Zhvillimit të Qëndrueshëm Lokal
Fokusi tematik i sotëm mbi mjedisin është shumë i qëlluar. Komunat e Kosovës përballen me sfida mjedisore në rritje si ndotja e ajrit dhe ujit, menaxhimi i mbeturinave dhe ndikimet e ndryshimeve klimatike. Megjithatë, shumë prej tyre nuk kanë kapacitetin apo burimet për të reaguar në mënyrë efektive. Përmes këtij Grupi Pune, shpresojmë të lidhemi me instrumente
financiare evropiane, ekspertizë teknike dhe modele të tranzicionit të gjelbër që mund të mbështesin veprimin lokal për klimën dhe planifikimin urban të qëndrueshëm.
Në përmbyllje, do të doja të theksoj një të vërtetë të thjeshtë: nuk mund të ketë të ardhme evropiane për Kosovën pa qeverisje të fortë, demokratike dhe të fuqizuar lokale. AKK është e përkushtuar ndaj këtij vizioni dhe jemi të gatshëm të jemi një partner aktiv dhe i besueshëm për këtë Grup Pune dhe për Komitetin Evropian të Rajoneve në përgjithësi.
Ju falënderoj edhe një herë për këtë mundësi dhe për njohjen dhe përfshirjen e komunave të Kosovës në punën tuaj të rëndësishme. Le të mos jetë ky vetëm një takim inaugurues, por fillimi i një partneriteti të gjatë dhe të frytshëm – tha në fjalën e vetë Kryetari i AKK-së z.Agim Aliu.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
