Me nderime të larta u varrosën Vehbi Halilaj dhe Mentor Kryeziu

04/04/2025 Institucionet

Të premtën është zhvilluar ceremonia e varrimit me nderimet më të larta për Vehbi Pajazit Halilajn (25.11.1979) nga Llapçeva dhe Mentor Maliq Kryeziun (14.02.1981) nga Bubaveci. Të dy ishin zhdukur 26 vite më parë në Kralan të Gjakovës dhe janë gjetur së fundmi në Bishtazhin, bashkë me shumë viktima të tjera.

Disa ditë më parë, është varrosur edhe Sabedin Kadri Kryeziu (15.06.1982 – 04.04.1999) nga Mleqani.

Ceremonitë e nderimit dhe varrimit janë organizuar nën përkujdesjen e kryetarit të Komunës së Malishevës, Ekrem Kastrati, me qëllim të dhënies së nderimeve të merituara për të rënët. Një ditë më parë është mbajtur edhe një mbledhje komemorative për tre të gjeturit nga Komuna e Malishevës, të cilët deri tani konsideroheshin persona të zhdukur.

Në homazhe dhe në ceremonitë e varrimit morën pjesë kryetari i Komunës së Malishevës, Ekrem Kastrati, kryesuesi i Kuvendit Komunal, Argjend Thaçi, përfaqësues të shoqatave që merren me çështjen e personave të zhdukur, të organizatave të dala nga lufta, figura publike e politike, si dhe qytetarë të shumtë.

Ceremonia e varrimit për Vehbi Halilajn dhe Mentor Kryeziun u zhvillua me nderime ushtarake, të realizuara nga pjesëtarët e Forcës së Sigurisë së Kosovës.

Si pasojë e vrasjeve dhe krimeve të bëra nga shteti serb, në territorin e Komunës së Malishevës, vazhdojnë të jenë të zhdukur dhe pa gjurmë, edhe 38 qytetarë të tjerë.

Kontrolloni gjithashtu

Agim Aliu pret Çekun, diskutojnë për investimet në Ferizaj

Kryetari i komunës së Ferizajt, z. Agim Aliu ka pritur në takim, ministrin në detyrë …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara