Reagim ndaj pretendimeve të publikuara në rrjete sociale nga kandidati për kryetar të Komunës së Vitisë, z. Bekim Azizi

Në lidhje me pretendimet e ngritura nga z. Bekim Azizi për procesin e konkurseve në arsim në Komunën e Vitisë, konsiderojmë të domosdoshme të sqarojmë opinionin publik dhe të hedhim poshtë çdo dezinformim e manipulim që po tentohet të bëhet përmes rrjeteve sociale.

Z. Azizi, në mungesë të një vizioni politik dhe alternativash konkrete për qeverisje, ka zgjedhur të manipulojë opinionin publik përmes publikimit të informatave të fabrikuara, duke keqpërdorur postin e tij për qëliimr politike. Ky veprim, përveç se është i paligjshëm, është edhe i papranueshëm për një kandidat për kryetar komune.

Procesi i konkurseve është kompetencë e Drejtorisë së Arsimit (DKA), në përputhje të plotë me ligjin dhe aktet nënligjore.

Asnjë listë zyrtare e kandidatëve nuk është publikuar nga DKA.

Për të garantuar ligjshmërinë, zyra e Kryetarit ka ndërmarrë veprimet e nevojshme administrative, përfshirë ndarjen e qartë të përgjegjësive mes zyrës së personelit dhe DKA-së.

Janë formuar komisione ligjore dhe profesionale, të cilat do të administrojnë dhe monitorojnë procesin deri në përfundim, duke garantuar transparencë, paanshmëri dhe trajtim të barabartë për të gjithë kandidatët.

Institucionet komunale janë plotësisht të përkushtuara që çdo hap i konkursit të jetë i dokumentuar dhe i qasshëm për publikun. Transparenca mbetet një nga parimet themelore të qeverisjes sonë, dhe çdo tentativë për ta cenuar atë përmes fabrikimeve politike është e destinuar të dështojë.

I bëjmë thirrje z. Azizi që, si kandidat për zgjedhjet lokale 2025, të heq dorë nga manipulimet dhe fabrikimi i situatave, dhe të zhvillojë garën e tij në mënyrë të ndershme e demokratike, përmes ideve dhe programeve konkrete për qytetarët e Vitisë.