SHPK “Grasep” shembull i suksesit në përpunimin e perimeve

Në kuadër të projektit “Zhvillimi i Zonave Rurale përmes Avancimit të Shërbimeve Këshillimore”, i cili implementohet nga organizata KDC me mbështetje të Ministrisë së Bujqësisë, Pylltarisë dhe Zhvillimit Rural (MBPZHR) dhe Drejtorisë së Bujqësisë në Komunën e Vitisë, sot është realizuar një vizitë studimore në fabrikën për konservimin e perimeve “Grasep” në fshatin Sllatinë e Epërme.

Vizita u zhvillua nën temën: “Praktikat e vjeljes, paketimit, transportit, ruajtjes dhe magazinimit të frutave”, me qëllim të shkëmbimit të përvojave dhe nxitjes së zhvillimit të qëndrueshëm bujqësor. Ky trajnim u udhëhoq nga Hasan Sejfiaj, këshilltarë privat i licencuar

Në këtë aktivitet morën pjesë: koordinatorja e projektit, Elheme Hetemi, dhe Drita Bislimi nga MBPZHR; drejtori i KDC-së, Ismet Isufi, me bashkëpunëtorë; fermerë nga komunat Viti dhe Kllokot, si dhe këshilltarja për bujqësi nga Drejtoria e Bujqësisë në Viti, Nebahate Pira.

Valbona Ajeti, pronare e “Grasep”, është një ndër fermeret më të suksesshme në këtë fushë. Fillimisht ajo ka nisur aktivitetin si pjesë e shoqatës së grave “Hortikultura”, ndërsa sot udhëheq një biznes të konsoliduar me statusin Sh.P.K., duke arritur të plasojë produktet e saj edhe në tregun ndërkombëtar.

Valbona theksoi se suksesin e saj ia dedikon jo vetëm përkrahjes së vazhdueshme nga Komuna e Vitisë – Drejtoria e Bujqësisë, por edhe këshilltares së bujqësisë Nebahate Pira, si dhe grave bashkëpunëtore, të cilat kanë qenë pjesë e ekipit që nga fillimi.

Kjo vizitë rezultoi shumë e frytshme për të gjithë pjesëmarrësit, pasi solli njohuri të drejtpërdrejta mbi praktikat më të mira në sektorin e frutave dhe perimeve, duke nxitur më tej bashkëpunimin dhe inovacionin në bujqësi.