Kryetari i komunës së Rahovecit, z. Smajl Latifi me bashkëpunëtor në Ditën Ndërkombëtare të të Zhdukurve, ka marr pjesë në Krushë të Madhe ku ndezën flakadanët për të kutjuar e nderuar kujtimin e 64 të zhdukurve me dhunë nga ky fshat, mes tyre edhe profesorin, intelektualin dhe veprimtarin e shquar, Ukshin Hoti.
“Të zhdukurit janë plagë që nuk e shëron koha. Fati i papërmbyllur i të zhdukurve me dhunë na kthen çdo ditë dekada pas, kur familjarët panë për të fundit herë të gjallë më të dashurit e tyre.
Në Ditën Ndërkombëtare të të Zhdukurve, kujtojmë 1577 bashkëqytetarët tanë që u rrëmbyen me forcë nga Serbia, për të cilët kurrë nuk dha një shpjegim nëse janë të gjallë a të vdekur, të vrarë apo të burgosur, për të qetësuar zemrat e nënave, baballarëve, vëllezërve e motrave tona.
Sonte në Krushë të Madhe ndezëm flakadanë për të kutjuar e nderuar kujtimin e 64 të zhdukurve me dhunë nga ky fshat, mes tyre edhe profesorin, intelektualin dhe veprimtarin e shquar, Ukshin Hoti.
Nuk do të ndalemi kurrë së kërkuari llogarinë që na e ka borxh Serbia, nuk do të ndalemi kurrë së kërkuari drejtësi për të pagjeturit, që nuk e panë asnjëherë Kosovën e lirë e të pavarur, siç e deshën dhe e ëndërruan. Ne nuk harrojmë”, ka shkruar në profilin e tij në facebook, kryetari i komunës së Rahovecit, z. Smajl Latifi.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
