Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në shënim të 26-vjetorit të Çlirimit të Kosovës, Shoqata e NATO-s e Kanadasë në bashkëpunim me Konsullatën e Përgjithshme të Kosovës në Toronto ka organizuar një ngjarje përkujtimore, ku Kosova u cilësua si një prej sukseseve më të mëdha të NATO-s. Ngjarja u hap me fjalën përshëndetëse të CEO-së së NAOC-it, Robert Baines, i cili theksoi rëndësinë historike të ndërhyrjes së NATO-s në Kosovë, duke e cilësuar atë si një vendim vendimtar për mbrojtjen e popullatës civile dhe për ndërtimin e paqes afatgjate në rajon. Ai nënvizoi se ky operacion ofron mësime të vlefshme për sfidat aktuale të sigurisë globale. Pjesë e mbrëmjes ishte edhe rrëfimi i ndjerë i një të mbijetuare të dhunës seksuale gjatë luftës në Kosovë, që preku thellë audiencën dhe solli në kujtesë mizoritë e konfliktit dhe forcën e atyre që kanë kaluar përmes traumës. Atdhe Hetemi, drejtor i Institutit për Krimet e Kryera Gjatë Luftës në Kosovë, tha se dokumentimi i krimeve është thelbësor për ndërtimin e paqes dhe pajtimit, dhe jo për hakmarrje. Ndërkaq, rektori i Universitetit të Prishtinës, Qerim Qerimi, foli për ligjshmërinë dhe legjitimitetin e ndërhyrjes së NATO-s, duke theksuar se situata në Kosovë kërkonte një reagim përtej kufijve të ligjit ndërkombëtar të kohës. Ngjarja shërbeu si një moment reflektimi mbi të kaluarën, por edhe si thirrje për të mos harruar arsyet e ndërhyrjes dhe për të thelluar përkushtimin ndaj paqes dhe drejtësisë.
