Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Administrata Tatimore e Kosovës, ka inkasuar 524.1 milionë euro të hyra tatimore gjatë periudhës janar-qershor të këtij viti, duke shënuar një rritje prej 50.9 milionë euro apo 10.8 për qind krahasuar me të njëjtën periudhë të vitit 2024. Të dhënat i bëri publike drejtori i përgjithshëm i ATK-së, Ilir Murtezaj, në një konferencë për medie të enjten, ku theksoi se performanca pozitive është pasojë e zbatimit të prioriteteve strategjike të institucionit. “Gjatë këtyre gjashtë muajve, ATK-ja ka vazhduar me përkushtim të zbatojë objektivat kryesore: rritjen e të hyrave, luftimin e ekonomisë joformale, avancimin e teknologjisë në shërbim të tatimpaguesve dhe përmirësimin e kulturës tatimore në vend”, tha Murtezaj. Ai theksoi gjithashtu se rritja e të hyrave është e lidhur edhe me reformat institucionale në procesin e fiskalizimit, i cili mbetet prioritet për transparencë dhe efikasitet më të madh në raport me bizneset. ATK ka shënuar performancë të qëndrueshme në katër vitet e fundit, duke raportuar rritje të të hyrave dhe përmirësim të treguesve të efikasitetit në administrimin tatimor.
