Kryetari i Komunës së Deçanit, Bashkim Ramosaj, ka shprehur kënaqësinë dhe nderin e veçantë për mirëpritjen në Bjeshkët e Deçanit të Njësisë Speciale Operative të Policisë së Kosovës, e cila këto ditë po zhvillon trajnimin e saj fushor në zonat malore të komunës.
Ai ka theksuar se prania e kësaj njësie elitare jo vetëm që tregon nivelin e lartë të përgatitjes dhe profesionalizmit të forcave tona të sigurisë, por gjithashtu forcon bashkëpunimin e ngushtë mes institucioneve lokale dhe atyre të rendit.
Sipas tij, ky aktivitet është shembull i përkushtimit të përbashkët për ruajtjen e sigurisë dhe rendit publik, duke dëshmuar gjithashtu mundësitë që ofron komuna e Deçanit si vend ideal për zhvillimin e trajnimeve të specializuara falë terrenit të saj të pasur, të larmishëm dhe sfidues.
“Kjo është një mundësi e shkëlqyer jo vetëm për forcimin e kapaciteteve të sigurisë, por edhe për promovimin e bukurive natyrore dhe potencialit të madh turistik që ofron rajoni ynë.
Falënderoj nga zemra Policinë e Kosovës për profesionalizmin, disiplinën dhe angazhimin e palodhshëm në shërbim të vendit dhe qytetarëve të tij,” është shprehur kryetari Ramosaj.
Ai ka shtuar se veprimtari të tilla na kujtojnë se siguria, zhvillimi dhe promovimi i trashëgimisë natyrore janë të ndërlidhura ngushtë, duke krijuar bazë për një të ardhme më të sigurt dhe më të begatë për të gjithë banorët e komunës dhe më gjerë.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
