Deklaratat e fundit të përfaqësuesve qeveritarë se “nuk mjafton një vit për ndryshimet kushtetuese” janë dëshmi e mungesës së vullnetit politik dhe e dështimit të kësaj qeverie për ta çuar vendin drejt integrimit europian dhe për të respektuar vetë Marrëveshjen e Ohrit. Prej ditës së parë të mandatit, përveç bllokimit të perspektivës evropiane, kjo qeveri dhe partnerët e saj kanë sulmuar themelet e barazisë dhe të Marrëveshjes së Ohrit: • kanë shfuqizuar balancuesin, duke cenuar përfaqësimin e drejtë të shqiptarëve dhe komuniteteve tjera; • kanë zhvlerësuar Marrëveshjen e Ohrit duke ia dorëzuar implementimin figurave me bindje antishqiptare dhe antiperëndimore, si Ivan Stoillkoviç; • kanë fshirë diasporën nga përfaqësimi politik dhe kanë zvogëluar shqiptarët në përllogaritjet zyrtare; • nuk respektojnë përdorimin zyrtar të gjuhës shqipe dhe kanë zhvlerësuar Inspektoratin e gjuhëve dhe Agjencinë e gjuhëve. Sot, përveç dështimit me ndryshimet kushtetuese, kjo qeveri hap fronte të reja kundër mekanizmave të barazisë si shumica e Badenterit, një nga shtyllat më të forta kushtetuese që garanton stabilitetin ndëretnik, barazinë reale në vend dhe mbron nga majorizimi. Çdo tentativë për ta relativizuar ose rishikuar Badenterin është tentativë për ta kthyer shtetin pas në përjashtim dhe diskriminim. Jemi dëshmitarë se gjithnjë e më shumë po zënë vend ide të rrezikshme, që përfaqësojnë ata që besojnë se shtetet multietnike nuk funksionojnë dhe se duhet ndërtuar shtete etnike. Kjo qasje manifestohet në dy drejtime: përmes goditjeve të Marrëveshjes së Ohrit, që rrënojnë barazinë e brendshme, dhe përmes bllokimit të rrugës europiane, që e izolon vendin dhe e kthen mbrapa. Bashkimi Demokratik për Integrim mbetet forca politike që ka mbrojtur dhe do të mbrojë Marrëveshjen e Ohrit, kursin euroatlantik të vendit dhe dinjitetin e qytetarëve. Shqiptarët nuk do të lejojnë kthimin e shtetit në padrejtësi dhe përjashtim. Tetori është afër dhe populli do të flasë fuqishëm. Ora e përgjegjësisë politike dhe juridike po afron. Marrëveshja e Ohrit nuk cenohet, barazia nuk negociohet.

BDI: Policia nuk është shtab zgjedhor – Pokuroria, MPB dhe KSHZ ta hetojnë Izetin

13/09/2025 Lajmet

Tema të tjera...

Dje, para syve të gjithë opinionit, kandidati për kryetar të Komunës së Çairit, Izet Mexhiti, pranoi se ka takuar policët shqiptarë të Çairit, Sarajit dhe Butelit. Madje nuk e mohoi se takimi është mbajtur në sallën e Këshillit të Komunës, në praninë e ndihmësministrit të Punëve të Brendshme, Xhelal Koka, vëllai i dhëndrit të tij.

Ky është skandal i rëndë dhe shkelje e drejtpërdrejtë e ligjit! Ligji për Policinë përcakton se policia është institucion i pavarur dhe neutral politikisht, e cila vepron vetëm në kuadër të kompetencave dhe detyrave ligjore. Ndërsa Kodi Zgjedhor ndalon kategorikisht përfshirjen e administratës shtetërore dhe shfrytëzimin e resurseve publike për qëllime partiake dhe zgjedhore.

Ne si BDI kërkojmë publikisht:

– Në çfarë cilësie një kandidat për kryetar komune thërret dhe takon policë?

– A ka qenë ky takim me dijeninë dhe autorizimin e ministrit të Punëve të Brendshme?

– Çfarë është diskutuar dhe a është kërkuar nga policët të ushtrojnë presion mbi qytetarët?

Nëse këto akuza vërtetohen, kemi të bëjmë me përdorim të policisë si instrument politik, gjë që përbën krim zgjedhor dhe shkelje të rëndë të rendit demokratik.

BDI i bën thirrje Ministrisë së Punëve të Brendshme, Komisionit Shtetëror të Zgjedhjeve dhe Prokurorisë Publike që menjëherë të hapin hetime dhe të informojnë opinionin se kush e ka urdhëruar këtë takim dhe çfarë është kërkuar nga pjesëtarët e policisë.

Çairi nuk do të lejojë frikësim e kërcënime! Ne do të mbrojmë çdo qytetar dhe çdo votë. Zgjedhjet e 19 tetorit do të jenë referendum për demokracinë dhe lirinë, jo për shtetin policor të Izet Mexhitit dhe klikës së tij.