Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Demokratike të Kosovës, Bedri Hamza, ka pritur në takim një delegacion të Bashkimit Evropian të kryesuar nga Emanuele Giaufret, Zëvendësdrejtor Menaxhues në EEAS për Evropën Perëndimore. Takimi u fokusua në zhvillimet aktuale politike dhe ekonomike në Kosovë, si dhe në thellimin e bashkëpunimit ndërmjet vendit dhe Bashkimit Evropian. Gjatë diskutimeve, Hamza ka mirëpritur rritjen e vëmendjes së BE-së ndaj Kosovës dhe rajonit, përfshirë edhe vendimin për heqjen e masave, duke e cilësuar këtë si një sinjal pozitiv për forcimin e partneritetit dhe perspektivës evropiane të vendit. Ai theksoi se stabiliteti i Kosovës dhe i rajonit është në interes të përbashkët si për vendet e Ballkanit Perëndimor, ashtu edhe për vetë Bashkimin Evropian. Në këtë kontekst, Hamza rikonfirmoi përkushtimin e PDK-së për bashkëpunim të ngushtë me partnerët ndërkombëtarë, duke vënë theksin te nevoja për mbështetje të vazhdueshme në përballimin e sfidave ekonomike dhe avancimin e reformave. Në takim u ritheksua gjithashtu se orientimi strategjik i Kosovës mbetet integrimi në Bashkimin Evropian dhe anëtarësimi në NATO, si rruga kryesore drejt zhvillimit, stabilitetit dhe konsolidimit të plotë euroatlantik të vendit.
