Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Anëtarët e Odës Ekonomike Amerikane në Kosovë kanë zhvilluar një takim me Lyn Debevoise, zëvendësdrejtor për Çështjet e Evropës Qendrore dhe Perëndimore në Departamentin e Shtetit, i cili po qëndron në Kosovë për t’u njohur nga afër me zhvillimet ekonomike në vend. Sipas njoftimit të Odës, Debevoise shfaqi interesim të theksuar për të dëgjuar drejtpërdrejt perspektivat dhe sfidat me të cilat përballen bizneset që operojnë në Kosovë, duke vlerësuar rolin e tyre në avancimin e marrëdhënieve ekonomike mes Kosovës dhe Shteteve të Bashkuara. Gjatë takimit, ai u informua për klimën aktuale të investimeve dhe potencialin e tregut vendor, ndërsa bizneset prezantuan zhvillimet e tyre më të fundit dhe kërkesat për përmirësim të mjedisit afarist. “Diskutimi u përqendrua në diplomacinë tregtare dhe mundësitë e reja për zgjerimin e shkëmbimeve ndërmjet SHBA-së dhe Kosovës, duke theksuar potencialin në rritje të ekonomisë sonë dhe angazhimin për forcimin e marrëdhënieve dypalëshe”, thuhet në njoftimin e Odës Ekonomike Amerikane.
