Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Drejtorati për Kulturë, Rini dhe Sporte i komunës së Lypjanit, iu ka përgjigjur pozitivisht kërkesës së Drejtorisë së Radios-Kosova e Lirë, për ta marrë nën mbrojtje institucionale shtëpinë e Arian Idriz Qeriqit, në fshatin Krojmir, ku ka qenë selia e parë e Radios Kosova e Lirë dhe Agjencisë së lajmeve Kosovapress, gjatë luftës së UÇK-së, në vitin 1998.
Në përgjigje të kërkesës thuhet se Drejtorati për Kulturë Rini dhe Sporte do të fillojë procedurën, në mënyrë që objekti i caktuar të përfshihet në planin lokal për Ruajtjen e Trashëgimisë Kulturore, duke sqaruar se komuna nuk ka kompetenca të nxjerrë ligje, por vetëm akte nënligjore dhe në këtë drejtim ajo do të angazhohet që kjo shtëpi të ketë përkujdesjen, ashtu sikur e meriton.
Radio-Kosova e Lirë, qysh në vitin 2003 ka ngritur “Shtëpinë Muze” në fshatin Berishë, të cilën nuk e ka marrë në mbrojtje institucionale komuna e Drenasit, edhe pse ka qenë e obliguar me vendim të Ministrisë së Kulturës me numër 2944/2008, lëshuar më 3. 11. 2008 për ruajtjen e trashëgimisë kulturore.
Kërkesa, prej vitit 2008 iu ka drejtuar secilës Qeveri, si edhe Qeverisë aktuale por drejtoria e Radios-Kosova e Lirë ende nuk ka marrë një sqarim zyrtar, lidhur me refuzimin antiligjor që i ka bërë komuna e Drenasit. Është për ta përshëndetur vendimin e Drejtoratit për Kulturë, Rini dhe Sporte të komunës së Lypjanit, për një përkujdesje, qoftë edhe modeste, të Shtëpisë, në Krojmir, ku ka qenë selia e parë e Radios dhe Agjencisë Kosovapress, thuhet në njoftimin e drejtorisë së Radios-Kosova e Lirë.
