Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministrja e Jashtme e Shqipërisë, Elisa Spiropali, gjatë vizitës së saj në Shkup, ka theksuar nevojën e respektimit të gjuhës shqipe, identitetit etnik dhe përfaqësimit të drejtë të komunitetit shqiptar në Maqedoninë e Veriut. Sipas saj, këto janë detyrime që duhet zbatuar plotësisht dhe pa ekuivok, duke u bazuar në Marrëveshjen e Ohrit, e cila sipas Spiropalit, është një standard i barazisë reale në të drejta, përfaqësim dhe dinjitet. “Respektimi i gjuhës shqipe, i identitetit etnik dhe i përfaqësimit të drejtë janë detyrime që duhen zbatuar plotësisht dhe pa ekuivokë”, ka deklaruar Spiropali, duke rikujtuar se Shqipëria mbështet integrimin evropian të Maqedonisë së Veriut, si vend fqinj, por edhe për shkak të rolit të komunitetit shqiptar, i cili përbën rreth 30% të popullsisë. Nga ana tjetër, ministri i Jashtëm i Maqedonisë së Veriut, Timço Mucunski, ka paralajmëruar për rrezikun e rritjes së “euro-pesimizmit” në shoqëri. Ai ka theksuar se ekziston një pjesë e qytetarëve që besojnë në të ardhmen evropiane të vendit, por nuk janë të bindur se Bashkimi Evropian do t’i hapë dyert. Kjo përplasje e tonit ndërmjet Tiranës dhe Shkupit tregon se respektimi i të drejtave të komunitetit shqiptar mbetet një pikë e ndjeshme, ndërsa perspektiva evropiane e Maqedonisë së Veriut duket e paqartë, duke rritur tensionet politike dhe shqetësimet për barazinë reale në vend.
