Ferizaj do të bëhet me Stadiumin e Ri Futbollistik “Ismet Shabani”

Kryetari i Komunës së Ferizajt, z. Agim Aliu përmes rrjetit social facebook ka njoftuar se qyteti i Ferizajt do të bëhet me Stadiumin e Ri Futbollistik “Ismet Shabani”, i cili do të ndërtohet në Kompleksin e Sporteve prapa Palestrës së Sporteve “Bill Klinton”.

Sipas kryetarit Aliu tashmë ka përfunduar hartimi i projektit zbatues dhe është shpallur procedura e prokurimit. Ai me këtë rast ka falënderuar Ministrinë e Kulturës Rinisë dhe Sporteve (MKRS) për dakordësinë e përbashkët në zhvillimin e këtij projekti dhe të gjithë kontribuesve në jetësimin e kësaj vepre madhore!