Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Moskonstituimi i Kuvendit dhe mosformimi i Qeverisë që nga zgjedhjet e 9 shkurtit po i shkakton Kosovës dëme të mëdha ekonomike dhe politike, thotë ekonomisti Safet Gërxhaliu. Në një intervistë për Ekonomia Online, ai e cilëson këtë si një ndër periudhat më të errëta në historinë e re të vendit.
Sipas Gërxhaliut, vendi ka humbur mbi 1.2 miliardë euro, përfshirë 830 milionë euro nga fondet e BE-së, projekte amerikane të bllokuara dhe marrëveshje të ngrira me Bankën Botërore. Investitorët po tërhiqen, ndërsa shumë kompani po e zhvendosin prodhimin në vendet e rajonit, kryesisht për shkak të paqëndrueshmërisë institucionale dhe rritjes së çmimit të energjisë.
Ai paralajmëron për pasoja të rënda në të gjitha aspektet: ekonomike, politike, integruese, psikologjike dhe emocionale, ndërsa shton se lufta për pushtet ka marrë përparësi ndaj interesit shtetëror.
“Është turpi më i madh që në një periudhë krizash globale, Kosova të ketë luksin të eksperimentojë me shtetin. Qytetarët ndihen të zhgënjyer, ndërsa Kosova mbetet nën sanksione evropiane – në të njëjtin rresht me Rusinë”, thekson Gërxhaliu.
Ai shton se stabiliteti politik është parakusht për zhvillim ekonomik, ndërsa paralajmëron për një ikje të trefishtë nga vendi: jo vetëm të të papunëve, por edhe të qytetarëve që kanë pasur stabilitet.
“Përderisa shtetet e zhvilluara përpiqen të afrohen me Amerikën dhe BE-në, Kosova po bën të kundërtën. Kjo është një vetëshkatërrim që gjeneratat e ardhshme do ta gjykojnë rëndë,” përfundon Gërxhaliu.
