Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Jakup Krasniqi do të mbetet në paraburgim. Gjykata speciale e Hagës ka refuzuar kërkesën për lirim të përkohshëm të ish-kryetarit të Kuvendit të Kosovës, duke theksuar se ekziston ende rreziku që ai të ndikojë në dëshmitarët e mbrojtjes, përfshirë edhe ata të avokatit të viktimave në çështjen që lidhet me drejtuesit e Ushtrisë Çlirimtare të Kosovës. Gjyqtarët kanë pranuar se nuk ekziston rrezik për arratisje, por kanë mbështetur qëndrimin se Krasniqi mund të pengojë rrjedhën e mëtejshme të procedurës gjyqësore, sidomos gjatë fazës ku do të paraqiten dëshmitarët e viktimave dhe të mbrojtjes. “Ekziston një klimë e vazhdueshme e frikësimit të dëshmitarëve në Kosovë,” thuhet në vendim, ku shtohet se “lirimi i Krasniqit mund të ketë efekt frenues në gatishmërinë e dëshmitarëve për të bashkëpunuar me Gjykatën”. Paneli i gjyqtarëve ka përmendur edhe postimin e vitit 2020, në të cilin Krasniqi e kishte quajtur Shkëlzen Gashin “kolaboracionist”, si provë e qëndrimeve publike që, sipas tyre, mund të shërbejnë si formë presioni ndaj zërave kritikë ose dëshmitarëve potencialë. Gjykata ka theksuar se as faza aktuale e gjykimit nuk e justifikon lirimin, dhe se çdo rrezik për pengim të drejtësisë apo kryerje të mëtejshme të veprave duhet të shmanget. Gjykimi ndaj Jakup Krasniqit dhe të akuzuarve të tjerë të UÇK-së po vazhdon në Hagë, në një proces që ka tërhequr vëmendje të madhe kombëtare dhe ndërkombëtare për ndjeshmërinë historike dhe politike që mbart.
