Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Lëvizja Vetëvendosje ka dështuar sërish në përpjekjen për të bllokuar pjesëmarrjen e Listës Serbe në zgjedhjet lokale që do të mbahen më 12 tetor 2025 në Kosovë. Pas ankesës së paraqitur nga kjo parti në KQZ, dhe më pas në Gjykatën Supreme, kërkesa e tyre është hedhur poshtë si e palejuar. Gjykata Supreme ka refuzuar ankesën e përfaqësuesve të Vetëvendosjes në KQZ, Sami Kurteshi dhe Alban Krasniqi, kundër vendimit të Panelit Zgjedhor për Ankesa dhe Parashtresa, i cili më herët kishte miratuar kërkesën e Listës Serbe për t’u certifikuar si subjekt zgjedhor. Me këtë vendim, KQZ obligohet ta certifikojë Listën Serbe për garën zgjedhore të tetorit. Ky zhvillim vjen pas një përpjekjeje të përsëritur të Vetëvendosjes për ta ndaluar pjesëmarrjen e Listës Serbe në zgjedhje, ashtu siç kishte ndodhur edhe para zgjedhjeve qendrore të 9 shkurtit të këtij viti. Por, njëjtë si atëherë, edhe kësaj here përpjekjet e VV-së janë konsideruar pa bazë ligjore dhe jashtë kompetencave institucionale. Partnerët ndërkombëtarë të vendit, përfshirë Shtetet e Bashkuara të Amerikës dhe Bashkimin Europian, kanë paralajmëruar më herët se këto manovra politike dëmtojnë demokracinë dhe proceset zgjedhore në vend.
