Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një konferencë për media, deputeti i PDK-së, Përparim Gruda, e ka kritikua ashpër Gjykatën Speciale për mbajtjen e ligjëratave nga zyrtarët e saj nëpër shkolla, duke bërë me dije se kjo gjykatë e ka devijuar misionin e saj.
Sipas tij, tendenca për rishkrimin e historisë në shkollat është e papranueshme.
“Nxënësve, shumica nën moshën 18-vjeçare, u janë paraqitur pretendime të njëanshme, duke u etiketuar ish-krerët e UÇK-së si kryerës të krimeve të luftës dhe krimeve kundër njerëzimit. Kjo është skandaloze dhe e papranueshme”, ka deklaruar Gruda.
Në këtë mënyrë, ka thënë ai, narrativa e Speciales po tentohet të futet edhe në bankat shkollore.
“Lufta jonë po sulmohet edhe nga bankat dhe klasat e shkollave tona. Por e vërteta jonë nuk mund të tjetërsohet në emër të ‘drejtësisë’ selektive, as të deformohet kujtesa kolektive në emër të ‘edukimit’,”, është shprehur ai, duke shtuar se këto ligjërata kanë për qëllim indoktrinimin e nxënësve.
“Toni i përdorur në këto prezantime i trajton Hashim Thaçin, Kadri Veselin, Jakup Krasniqin dhe Rexhep Selimin si fajtorë, duke paragjykuar vendimin përfundimtar. Gjykatat e vërteta merren me drejtësi, jo me propagandë”, ka theksuar Gruda.
