Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në përfundim të mandatit të tij diplomatik në Kosovë, ambasadori i Finlandës, Matti Nissinen, ka shprehur mbështetjen e vazhdueshme të vendit të tij për Kosovën dhe perspektivën e saj euroatlantike. Nissinen theksoi se Kosova është përballur me sfida politike, por mbetet optimist për të ardhmen e saj. “Jemi dëshmitarë të një situate sfiduese politike në Kosovë. Shpresoj që bllokada aktuale të tejkalohet sa më shpejt, sepse është në interesin e të gjithë qytetarëve,” tha ai. Duke folur për marrëdhëniet bilaterale, ambasadori përmendi trashëgiminë e ndërmjetësimit të Martti Ahtisaarit dhe përkushtimin e vazhdueshëm të Finlandës ndaj shtetndërtimit dhe integrimit të Kosovës. “Gjatë mandatit tim, kam dashur të sigurohem që bashkëpunimi bilateral të jetë gjithëpërfshirës. Kemi investuar shumë në përmirësimin e tregtisë dhe në ndarjen e përvojave për proceset integruese,” u shpreh ai. Ai theksoi mbështetjen e fortë të Finlandës për anëtarësimin e Kosovës në Bashkimin Evropian dhe NATO:
“Jemi ndër përkrahësit më të afërt dhe më të mëdhenj të Kosovës në çdo nivel, nga Brukseli deri te forumet dypalëshe. Kemi ndarë përvojat tona për ndërtimin e kapaciteteve institucionale që i nevojiten një shteti në rrugëtimin e tij drejt anëtarësimit.” Matti Nissinen largohet nga Kosova pas një mandati diplomatik që u karakterizua me intensifikim të bashkëpunimit në fusha të shumta dhe mbështetje të qartë për rrugën euroatlantike të vendit.
