Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 7 mars 2025, në moshën 79-vjeçare, pas një sëmundjeje të rëndë dhe të gjatë, ndërroi jetë drejtori i Radios “Kosova e Lirë” dhe profesori i shquar, Ahmet Qeriqi. Ai u nda nga jeta duke lënë pas një trashëgimi të pasur në fushën e medias dhe arsimit, duke qenë një figurë e respektuar dhe e përkushtuar ndaj çështjes kombëtare dhe informimit publik. Më 7 mars 2025, në një ceremoni madhështore dhe plot emocione, u bë varrimi i tij në vendlindjen e tij në fshatin Krojmir të Drenicës. Në ceremoninë e lamtumirës së fundit morën pjesë mijëra qytetarë nga të gjitha trojet shqiptare, përfaqësues të institucioneve shtetërore, figura të njohura të jetës akademike, mediatike dhe shoqërore, si dhe bashkëluftëtarë e miq të tij të shumtë. Për nder të jetës dhe veprës së tij, ceremonia e varrimit u zhvillua me nderime të larta shtetërore dhe ushtarake, ku Garda e Nderit e Forcës së Sigurisë së Kosovës (FSK) përcolli trupin e tij. Po ashtu, ceremonia u krye sipas riteve fetare, duke shprehur respektin dhe mirënjohjen për kontributin e tij të çmuar në shoqëri dhe kombin shqiptar. Familja Qeriqi, me këtë rast, shpreh mirënjohje të thellë dhe falënderon nga zemra të gjithë ata që morën pjesë në ceremoninë mortore dhe që ndanë dhimbjen me ta në këto momente të vështira. Kujtimi dhe vepra e profesor Ahmet Qeriqit do të mbetet përherë në kujtesën e popullit shqiptar, si një zë i së vërtetës dhe një mbrojtës i paepur i lirisë dhe drejtësisë.
