Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Autori Gani S. Pllana, me librin e tij më të ri të poezive “Në Peshoren e Zemrës”, vjen para lexuesve si një udhëtar i shpirtit i kujtimeve dhe i emocioneve që shpesh ngelen të pashprehura. Poemat e tij janë si rrezet e mëngjesit që çajnë mjegullën e shpirtit: të ngrohta, të sinqerta dhe të mbushura me frymë shqiptare.
Që në faqet e para, autori na çon drejt Horës së Arbëreshëve, një vend ku kujtesa bëhet flamur dhe gjuha ruhet si pasuri e shenjtë. Përmes vargjeve, ai e përshkruan mallin jo si dobësi, por si forcë që e mban njeriun të lidhur me trungun e tij, edhe kur degët tretën nëpër botë.
Tema e familjes vjen si një shtyllë kryesore e librit. Familja dhe figurat e shenjta të shtëpisë marrin jetë e zë, duke i dhënë lexuesit mundësinë të përfshihet në atmosferën e një dashurie që nuk shuhet kurrë. Autori e sheh familjen si strehën ku njeriu rikthehet, edhe kur udhët e botës e lodhin.
Në këtë udhëtim poetik, një nga kulmet shpirtërore është NËNA. Te Pllana, ajo nuk është vetëm personazh, por dritë. Është flamuri i sakrificës, lutja që nuk vdes, dhe gjurma më e paharruar në jetën e secilit. Nëna e tij poetike jeton ndërmjet tokës dhe mallit, duke bartur historinë e një populli që shpesh është dashur të flasë me heshtje.
Autori prek edhe temat e atdheut, të dashurisë që dhemb, të mërgimit ku zemra ndahet më dysh. Secila poezi e Pllanës shërben si një pasqyrë ku lexuesi sheh veten, kujton, buzëqesh dhe lëshon një psherëtimë të brendshme.
Libri “Në Peshoren e Zemrës” është më shumë se vargje në letër. Është një thirrje që njeriu t’i dëgjojë rrahjet e zemrës së vet dhe të mos harron se identiteti ndërtohet nga kujtimet, nga njerëzit tanë dhe nga vendet që na mbeten në shpirt, edhe kur i kemi lënë pas.
Autori Gani S. Pllana nuk ndalet me kaq. Ai ka botuar edhe vepra të tjera letrare, duke kontribuar vazhdimisht në pasurimin e kulturës sonë dhe në ruajtjen e fjalës artistike shqipe.
Urojmë që pena e tij të vazhdojë të shkruajë, të hapë shtigje të reja poetike dhe të prek zemrat e lexuesve edhe për shumë vite të tjera. Le të jetë libri “ Në Peshoren e Zemrës” edhe një hap drejt majave të reja të krijimtarisë së tij!
