Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK-së, nën udhëheqjen e kryetarit Hysni Gucati, i ndau Dekoratën post-mortum profesor Ahmet Qeriqit, ish-drejtorit të Radio Kosova e Lirë, në shenjë mirënjohjeje dhe vlerësimi për kontributin e tij të jashtëzakonshëm në shërbim të çështjes kombëtare dhe mbështetjen e palëkundur ndaj luftës çlirimtare të Ushtrisë Çlirimtare të Kosovës.
Dekorata u nda me motivacionin:
“Për kontributin e dhënë për çështjen kombëtare dhe veprimtarinë e jashtëzakonshme në mbështetje të luftës çlirimtare të UÇK-së.”
Në një ceremoni të organizuar në nderim të jetës dhe veprës së profesor Ahmet Qeriqit, Dekoratën e dorëzoi kryetari i OVL-së së Familjeve të Dëshmorëve, z. Xhavit Jashari, ndërsa në emër të familjes, atë e pranoi me mirënjohje djali i profesorit, Epir Qeriqi.
Gjatë ceremonisë, u theksua se profesor Ahmet Qeriqi mbetet një nga figurat më të rëndësishme të informimit dhe propagandës gjatë luftës çlirimtare, i njohur për përkushtimin e tij të pashoq në përhapjen e së vërtetës për sakrificat dhe përpjekjet e Ushtrisë Çlirimtare të Kosovës.
Z. Xhavit Jashari, gjatë dorëzimit të Dekoratës, vlerësoi profesor Ahmet Qeriqin si një personalitet të rrallë që përjetësisht do të mbetet në kujtesën e popullit shqiptar për rolin e tij jetik në dokumentimin dhe përhapjen e të vërtetës për luftën çlirimtare dhe sakrificën e dëshmorëve të kombit.
Familja Qeriqi shprehu mirënjohje të thellë për këtë vlerësim të lartë, duke falënderuar Organizatën e Veteranëve të Luftës së UÇK-së për nderimin dhe vëmendjen e vazhdueshme ndaj veprës së profesor Ahmet Qeriqit.
Lavdi jetës dhe veprës së profesor Ahmet Qeriqit!
