Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i AAK-së, Pal Lekaj, ka mirëpritur deklaratën e presidentit amerikan Donald Trump për rikthimin e angazhimit të tij në zgjidhjen e çështjes Kosovë–Serbi, duke e cilësuar këtë si një sinjal shpresëdhënës për paqe dhe stabilitet në rajon. Lekaj tha se roli aktiv i administratës Trump gjatë mandatit të tij të parë kishte sjellë një dinamikë të re në dialogun ndërmjet dy vendeve, që kulmoi me Marrëveshjen e Uashingtonit në vitin 2020. “Presidenti Trump e dëshmoi atëherë se është i vendosur për paqe, stabilitet dhe zhvillim ekonomik në Ballkan, pa burokraci të tejzgjatur dhe me një qasje të qartë pro-amerikane, që dalloi nga pasiviteti i institucioneve evropiane”, theksoi Lekaj. “Angazhimi i Trump për t’u kthyer te kjo temë është shpresëdhënës dhe i mirëpritur, sepse ne besojmë në lidership të qartë, vendime të guximshme dhe përkushtim ndaj një paqeje të qëndrueshme, ku Kosova trajtohet si palë e barabartë dhe jo nën presion,” u shpreh ai. Sipas Lekajt, një qasje e vendosur amerikane për përmbylljen e dialogut me njohjen përfundimtare të pavarësisë së Kosovës nga Serbia do të ishte e mirëpritur dhe historike.
