Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shoqata e Prodhuesve Vendor, në kuadër të Odës Ekonomike të Kosovës, ka nisur një betejë ligjore ndaj Zyrës së Rregullatorit për Energji , duke kundërshtuar vendimin për kalimin e detyrueshëm të bizneseve në tregun e lirë të energjisë elektrike. Sipas tyre, kjo masë po i ekspozon prodhuesit vendas ndaj çmimeve trefish deri katërfish më të larta të energjisë. Kushtrim Ajvazi, përfaqësues i Shoqatës, theksoi se ky vendim i ZRrE-së është i jashtëligjshëm dhe i dëmshëm për sektorin prodhues në Kosovë. Ai bëri të ditur se janë ndërmarrë hapat e parë ligjorë për të kundërshtuar zbatimin e tij. “Beteja ligjore ka filluar! Vendimi i jashtëligjshëm i ZRrE-së nuk do të mbetet pa përgjigje. Nuk do të ndalemi derisa ta rrëzojmë këtë vendim të padrejtë dhe të rikthejmë të drejtën që na takon. E kemi borxh ndaj çdo fabrike, çdo punëtori dhe ndaj së ardhmes së këtij vendi”, deklaroi Ajvazi përmes një reagimi publik. Prodhuesit kanë paralajmëruar se rritja e kostos së energjisë po rrezikon seriozisht konkurrueshmërinë e tyre dhe stabilitetin e mijëra vendeve të punës. Ata kërkojnë rishikim urgjent të politikave energjetike dhe rikthim të kushteve të barabarta për të gjithë pjesëmarrësit në treg.
